کوئٹہ : بلوچستان کے علاقے دکی کی کانوں سے پنجاب کو کوئلے کی سپلائی معطل ہوگئی جس کی وجہ مظاہرین کی جانب سے اہم شاہراہوں کو بلاک کرنا بتایا گیا ہے۔
تفصیلات کے مطابق کان کنوں اور کوئلے کے ٹرکوں پر مسلح افراد کے حملوں اور ان کو جلانے کے خلاف بلوچستان کے بعض علاقوں میں کان کنوں اور مالکان کے احتجاجی دھرنے کے باعث دکی اور دیگر علاقوں کی کوئلہ کانوں کا کوئلہ پنجاب سمیت دیگر صوبوں میں پہنچانے میں مشکلات کا سامنا ہے۔
رپورٹ کے مطابق مظاہرین نے دکی اور دیگر کول فیلڈ علاقوں کو پنجاب اور ملک کے دیگر صوبوں سے ملانے والی اہم شاہراہوں کو جام کردیا۔
دکی اور ہرنائی کے علاقوں میں احتجاج کرنے والے کان مالکان نے شکایت کی کہ پنجاب میں کان کنوں اور کوئلے کے ٹرکوں پر حملے روز کا معمول بن چکے ہیں۔
انہوں نے کہا کہ فائرنگ کے حالیہ واقعات کے بعد ہمارے پاس کانیں بند کرنے کے علاوہ کوئی چارہ نہیں، ہم نے پنجاب کو کوئلے کی سپلائی روک دی ہے۔
انہوں نے کہا کہ حکومت کو بارہا اپیلوں کے باوجود کان مالکان اور مزدوروں کے تحفظ کے لیے کوئی انتظامات نہیں کیے گئے۔ تقریباً دو ماہ قبل مسلح افراد نے کوئلے سے لدے 10 ٹرکوں کو روک کر آگ لگا دی تھی۔
مظاہرین نے مکمل سیکورٹی کا اعلان کرتے ہوئے کہا کہ جب تک ان کے مطالبات پورے نہیں ہوتے وہ مرکزی شاہراہ پر اپنا دھرنا جاری رکھیں گے جب کہ احتجاج کے باعث بڑی تعداد میں کوئلے کے ٹرک پھنسے ہوئے ہیں۔
دوسری جانب حکام نے دعویٰ کیا کہ مقامی انتظامیہ حالیہ حملوں میں ملوث عناصر کے خلاف سخت کارروائی کرنے کی پوری کوشش کر رہی ہے۔ انہوں نے کہا کہ حکومت کان کنوں اور مالکان کو بہترین ممکنہ سیکورٹی فراہم کرے گی۔
