راولپنڈی : آرمی چیف جنرل عاصم منیر نے ریاض میں سعودی ولی عہد محمد بن سلمان سے ملاقات کی، اس موقع پر دفاعی اور مختلف امور پر تبادلہ خیال کیا گیا۔
پاک فوج کے شعبہ تعلقات عامہ آئی ایس پی آر کے جاری کردہ بیان کے مطابق آرمی چیف جنرل سید عاصم منیر سعودی عرب کے سرکاری دورے پر ہیں۔
آرمی چیف جنرل سید عاصم منیر کا رائل پیلس آمد پر پُرتپاک استقبال کیا گیا، اس موقع پر انہوں نے سعودی ولی عہد شہزادہ محمد بن سلمان سے ملاقات کی۔
آئی ایس پی آر کے مطابق اس موقع پر آرمی چیف اور سعودی ولی عہد نے باہمی دلچسپی کے امور پر تبادلہ خیال کیا، ملاقات میں عسکری ودفاعی تعاون، علاقائی اورعالمی مسائل پربات چیت کی گئی۔
آرمی چیف نے پاکستان کی حمایت پر سعودی ولی عہد سے اظہار تشکر کیا، آرمی چیف نے خطےمیں امن وامان کے لیے ولی عہد کی کوششوں کی تعریف کی۔
آئی ایس پی آر کے مطابق اس کے علاوہ آرمی چیف نے سعودی وزیر دفاع شہزادہ خالد بن سلمان سے بھی خصوصی ملاقات کی، ملاقات میں دفاعی اور سیکیورٹی تعاون پر تبادلہ خیال کیا گیا، ملاقاتوں میں سعودی عسکری قیادت بھی موجود تھی۔
