ریاض: نجران یونیورسٹی کی طالبات نے جامعہ کی کیفے ٹیریا کے خلاف شکایات کا انبار لگا دیا جس کے بعد کیفے ٹیریا کی جانب سے انہیں مفت کافی پیش کی جانے لگی۔
سعودی ویب سائٹ کے مطابق سعودی شہر نجران کی یونیورسٹی کی طالبات نے شکایت کی تھی کہ جامعہ کے کیفے ٹیریا میں کھانے پینے کی اشیا صحت بخش نہیں ہیں۔
دوسری شکایت یہ کی گئی کہ کھانے پینے کی اشیا میں تنوع نہیں ہے جبکہ کھانے پینے کی اشیا کے نرخ زیادہ ہیں۔
طالبات کا کہنا تھا کہ یونیورسٹی انتظامیہ نے کیفے ٹیریا کی موجودگی کی وجہ سے باہر سے کھانے پینے کی اشیا لانے کو ممنوع قرار دے رکھا ہے۔
تاہم طالبات کی شکایات کے بعد کیفے ٹیریا نے صبح انہیں گرما گرم مفت کافی پیش کرنا شروع کردی ہے جس پرطالبات نے خوشی کا اظہار کیا ہے۔
ایک طالبہ کے مطابق کیفے ٹیریا سے کھانے پینے کی جو اشیا ملتی ہیں ان سے صحت متاثر ہو رہی ہے، کھانوں میں کیلوریز بہت زیادہ ہیں جو صحت کے لیے مضر ہیں۔
ایک اور طالبہ کا کہنا تھا کہ ایک جانب تو کیفے ٹیریا نامناسب کھانے پیش کر رہا ہے جبکہ دوسری جانب ہمیں گھر سے ناشتہ لانے کی بھی اجازت نہیں۔
طالبات کی شکایات کے بعد یونیورسٹی انتظامیہ نے نوٹس لے لیا، یونیورسٹی کے ترجمان کے مطابق کیفے ٹیریا کو قواعد و ضوابط کا پابند بنا دیا گیا ہے اور ہدایت کی گئی ہے کہ طالبات کو مناسب وقت پر مناسب کھانے پینے کی اشیا معقول نرخوں پر فراہم کی جائیں۔
