ملک بھر میں سرد موسم اپنے عروج پر ہے۔ پنجاب کے مختلف شہروں میں شدید دھند کی وجہ سے اوکاڑہ سے بہاولپور تک نیشنل ہائی وے پر حد نگاہ صفر ہوگئی۔ دوسری جانب اسکردو اور ملحقہ علاقوں میں ایک روز کے وقفے کے بعد برف باری کا سلسلہ دوبارہ شروع ہوگیا۔
تفصیلات کے مطابق پنجاب کےمختلف شہروں میں شدید دیکھی جارہی ہے۔ اوکاڑہ سے بہاولپور تک نیشنل ہائی وے پر حد نگاہ صفر ہوگئی۔ ترجمان موٹر وے پولیس نے ہدایت کی ہے کہ شہری غیر ضروری سفر سے اجتناب کریں اور دوران سفر فوگ لائٹس استعمال کریں۔
دھند کے باعث چکوال میں موٹر وے پر ٹریلر اور مسافر بس میں تصادم ہوگیا جس میں 3 افراد جاں بحق اور 8 زخمی ہوگئے۔
مزید پڑھیں: دھند کے موسم میں احتیاطی تدابیر اختیار کریں
ادھر اسکردو اور ملحقہ علاقوں میں ایک روز کے وقفے بعد برف باری کا سلسلہ دوبارہ شروع ہوگیا جس کے بعد اسکردو کا فضائی اور زمینی راستہ منقطع ہو گیا۔
دوسری جانب نیشنل ہائی ویز انتظامیہ کا کہنا ہے کہ لواری ٹنل کو مسافر گاڑیوں کے لیے آج کھول دیا جائے گا۔ ٹنل کو برفباری کے باعث گزشتہ روز بند کیا گیا تھا۔
محکمہ موسمیات کا کہنا ہے کہ آئندہ 24 گھنٹوں میں ملک کے بیشتر علاقوں میں موسم سرد اور خشک رہے گا۔ بالائی علاقوں میں مطلع اب رآلود رہے گا جبکہ مالاکنڈ، ہزارہ ڈویژن، فاٹا، گلگت بلتستان اور کشمیر میں چند مقامات پر بارش اور پہاڑوں پر برفباری کا امکان ہے۔
خیبر پختونخوا، پنجاب کے میدانی علاقوں اور بالائی سندھ میں رات اور صبح کے اوقات میں شدید دھند پڑنے کا امکان ہے۔