محکمہ موسمیات نے کراچی میں سردی کے حوالے سے پیشگوئی کردی، نیا سال اپنے ساتھ سخت سردی کی نئی لہر لائے گا۔
محکمہ موسمیات کے مطابق 4جنوری سے کراچی میں سردی میں اضافے کا امکان ہے جبکہ شہر قائد کا درجہ حرارت ایک ہندسے میں جانے کا بھی اشارہ دیا ہے۔
اس کے علاوہ ملک کے مختلف علاقوں میں ہلکی بارش اور بوندا باندی کا امکان ہے، ساتھ ہی کشمیر،گلگت بلتستان میں شدید سردی اور برفباری ہوسکتی ہے۔
رپورٹ کے مطابق چترال، دیر، سوات میں برفباری متوقع ہے، کوئٹہ بارکھان میں بارش اور برفباری ہو سکتی ہے،کراچی میں مطلع جزوی طور پر ابر آلود رہے گا۔
علاوہ ازیں چمن سمیت پاک افغان سرحدی علاقوں میں بارش کے ساتھ ہی سردی میں بھی اضافہ ہوگیا لوگ گھروں سے باہر نہ نکلنے پر مجبور ہیں۔
محکمہ موسمیات کے مطابق مغربی سسٹم کے زیر اثر لاہور سمیت پنجاب میں جمعرات سے بارش، آزاد کشمیر میں برف باری متوقع ہے۔
خیبر پختونخوا، پنجاب کے مختلف شہروں میں دھند کے ساتھ اسموگ کا صورتحال پیدا ہو سکتی ہے جبکہ تھرپارکر سندھ میں شدید سردی کا امکان ہے۔
محکمہ موسمیات کے مطابق بارش کا سبب بننے والی مغربی ہوائیں ایران کے راستے بلوچستان میں داخل ہوگئی ہیں جو 4 جنوری تک صوبے میں موجود رہیں گی۔
