بگوٹا: جنوبی امریکا میں واقع ملک کولمبیا میں ایک نوجوان ہوا بیچ کر لکھ پتی بن گیا۔
تفصیلات کے مطابق کولمبیا کے دوسرے بڑے شہر الوراڈو کا رہائشی نوجوان جوآن کارلوس اپنے شہر کی ہوا بیچ کر روزانہ سیکڑوں ڈالر کمانے لگا ہے۔
الوراڈو شہر میں سارا سال موسم خوش گوار رہتا ہے اور لوگوں کی بڑی تعداد یہاں آتی ہے، جوآن کارلوس نے اسی بات کا فائدہ اٹھایا، اور اپنے اس شہر کی ہوا کو پیک کر کے بیچنے کا کام شروع کر دیا۔
کارلوس نے ایک انٹرویو میں بتایا کہ ہم اپنے شہر کی اچھے معیار کی ہوا کو بوتلوں میں پیک کرتے ہیں۔
اُنھوں نے شہر کی ہوا کو پیک کرنے کا طریقہ بتاتے ہوئے کہا کہ ’ایئر کلیکٹر‘ نامی ایک آلے سے ہوا کے ذرات 15 سے 30 منٹ میں جمع کر لیے جاتے ہیں اور پھر انھیں بوتلوں میں پہنچایا جاتا ہے، اس طرح 100 فیصد خالص ہوا بوتلوں میں پیک کی جاتی ہے۔
جوآن کارلوس نے پہلے روز ہوا سے بھری 77 بوتلیں فروخت کیں، جن میں سے ہر بوتل کی قیمت 5 ڈالرز تھی جب کہ تیسرے روز اس نے 300 بوتلیں فروخت کیں۔
View this post on Instagram
کاروبار چمکنے کے بعد اب اس انوکھے اور دل چسپ کام کے ٹی وی اور سوشل میڈیا پر بھی چرچے ہونے لگے ہیں، کارلوس نے ایک سوشل میڈیا اکاؤنٹ اور ویب سائٹ بھی بنا لی ہے۔
یاد رہے کہ 2013 میں چین میں بھی ایک کروڑ پتی کاروباری شخص چِن گوانگبیاؤ نے ملک میں بے پناہ آلودگی کے ماحول میں تازہ ہوا کے کین فروخت کرنے کا کاروبار شروع کیا اور صرف 10 دنوں میں 10 ملین کین فروخت کیے۔
