The news is by your side.

Advertisement

شہباز شریف کی کمر کے پٹھے سوجن کا شکار، بابر اعوان کا تبصرہ

لاہور: اپوزیشن لیڈر شہباز شریف کی صحت سے متعلق ڈاکٹرز نے اپنی رپورٹ میں کہا ہے کہ ان کی کمر کے پٹھے سوجن کا شکار ہو گئے ہیں، اس لیے انھیں ایک ہفتہ مکمل آرام کرنا چاہیے۔

تفصیلات کے مطابق میاں شہباز شریف کا پمز کے ڈاکٹرز کی ٹیم نے معائنہ کیا، ان کے علاج سے متعلق پمز کے ڈاکٹرز نے رپورٹ میں لکھا کہ 70 سال کے شہباز شریف سر درد اور کمزوری کی شکایت کر رہے ہیں، نیورو سرجن کے مطابق شہباز شریف کے پٹھے سوجن کا شکار ہیں۔

رپورٹ میں کہا گیا ہے کہ مسلسل سفر کی وجہ سے شہباز شریف کی کمر میں شدید درد ہو رہا ہے، انھوں نے مزید سفر کیا تو کمر کی تکلیف بڑھ جائے گی۔

ڈاکٹرز کی جانب سے شہباز شریف کو ایک ہفتے کی مکمل آرام کی ہدایت کی گئی ہے، ذرائع کا کہنا ہے کہ ڈاکٹرز نے شہباز شریف کے جسم میں خون اور آئرن کی شرح جانچنے کا فیصلہ کیا ہے، اور انھیں ٹی آئی بی سی، سیرم آئرن ٹیسٹ تجویز کر دیا ہے۔

دوسری طرف معروف قانون دان ڈاکٹر بابر اعوان نے شہباز شریف کی رپورٹ سے متعلق تبصرہ کرتے ہوئے کہا ہے کہ میں میڈیکل بورڈ کی رائے پر کچھ نہیں کہوں گا، پٹھا پٹھا ہوتا ہے اور پمز پمز ہوتا ہے اس سے آگے نہیں جاؤں گا، اس سے پہلے بھی شہباز شریف کے کمر کے پٹھے کھنچ گئے تھے۔

بابر اعوان نے سینیٹ الیکشن کے دوران خرید و فروخت کے حوالے سے کہا اے آر وائی نیوز پر ویڈیو نہ آتی تو جو کہتے رہے اس کا ثبوت بھی نہ آتا، اب ویڈیو کے ساتھ ساتھ آڈیو بھی آگئی ہے، سینیٹ الیکشن میں خرید و فروخت کی کوشش کے ثبوت سامنے آ گئے ہیں، ماضی کی نسبت اتنے لوگ کبھی بے نقاب نہیں ہوئے جتنا اس بار ہوئے۔

Comments

یہ بھی پڑھیں