لاہور : جوائنٹ انٹروگیشن ٹیم چیئرمین تحریک انصاف عمران خان پر قاتلانہ حملے کی تحقیقات کے لئے وزیرآباد پہنچ گئی۔
تفصیلات کے مطابق پاکستان تحریک انصاف کے چئیرمین عمران خان پر قاتلانہ حملہ میں بنائی گئی کمیٹی نے بالاآخر 14 روز بعد کام شروع کردیا۔
عمران خان پر قاتلانہ حملے کے معاملے کی تحقیقات کے لئے سی سی پی او لاہور غلام محمود ڈوگر کی سربرائی میں بنائی جانے والی جوائنٹ انٹروگیشن ٹیم وزیرآباد پہنچ گئی۔
جوائنٹ انٹروگیشن ٹیم کے2ارکان وزیرآبادپہنچے ہیں ، سید خرم علی شاہ اورنصیب اللہ نےجائےوقوعہ کا دورہ کیا اور جائے وقوع سے شواہد اکٹھے کیے۔
دوسری جانب گرفتار ملزم نوید کے جسمانی ریمانڈ کے لیے عدالت میں پیش کیے جانے کا بھی امکان بتایا گیا ہے۔
گذشتہ روز پاکستان تحریک انصاف کے چیئرمین عمران خان پر قاتلانہ حملے کی تحقیقات کے لیے پنجاب حکومت نے جوائنٹ انویسٹی گیشن ٹیم (جے آئی ٹی) بنائی تھی۔
حکومت پنجاب کی جانب سے بنائی گئی جے آئی ٹی 6 اراکین پر مشتمل ہے جس کے سربراہ سی سی پی او لاہور غلام محمود ڈوگر ہوں گے جب کہ ٹیم کے دیگر اراکین میں آر پی او ڈی جی خان سید خرم علی، ایس پی پوٹھوہار ملک طارق محبوب، اے آئی جی مانیٹرنگ انویسٹی گیشن پنجاب احسان اللہ چوہان، آر او سی ٹی ڈی راولپنڈی ڈویژن نصیب اللہ شامل ہیں۔