ورجینیا : امریکا میں برفباری نے نظام زندگی منجمد کردیا ہے، تباہ کن طوفانی برفباری سے شمال مغربی ریاستوں میں ٹریفک کا نظام درہم برہم اور ہزاروں پروازیں بھی منسوخ کردی گئیں جبکہ لاکھوں افراد بجلی سے محروم ہوگئے۔
امریکی ریاست شمالی ورجینیا میں ہونے والی برفباری کے منظر نے دیکھنے والوں کو حیرت زدہ کردیا، 48 گھنٹوں کے دوران ہونے والی برفباری سے پورا شہر ڈھک گیا۔
سوشل میڈیا پر وائرل ہونے والی 48 گھنٹوں پر مشتمل ویڈیو میں شمالی ورجینیا کے ایک علاقے میں بنائی گئی سی سی ٹی وی کی اس فوٹیج کے دورانیے کی رفتار بڑھا کر دکھایا گیا ہے۔
ویڈیو دیکھ کر اس بات کا بخوبی اندازہ لگایا جاسکتا ہے کہ کس طرح ایک قصبہ 48 گھنٹوں کے اندر برف سے پوری طرح ڈھک گیا تھا اور موسم کس قدر سنگین تھا۔
فوٹیج کے پہلے منظر میں گھاس پر رکھی ایک کرسی دکھائی دیتی ہے منظر میں سڑک پر چند گاڑیاں بھی آتی جاتی دکھائی دے رہی ہیں پھر جیسے ہی برفانی طوفانی برف باری شروع ہوتی ہے آہستہ آہستہ پورا علاقہ برف سے ڈھک جاتا ہے۔
48 hour timelapse of Blizzard in 60 seconds. pic.twitter.com/tPjrUFnmzR
— Weird and Terrifying (@weirdterrifying) December 29, 2022
اس ویڈیو کو سوشل میڈیا پر تقریباً 50 لاکھ سے زائد بار دیکھا جاچکا ہے اور اب تک 76 ہزار سے زائد لائکس ہوچکے ہیں۔ بہت سے صارفین نے اس خوبصورت اور حیران کن ویڈیو پر اپنے خیالات کا بھی اظہار کیا۔
امریکہ اس وقت سائیکلون بم نامی سرد طوفان سے دوچار ہے، بعض مقامات پر درجہ حرارت منفی پانچ ڈگری سے بھی نیچے ہے طوفان سے اب تک تقریباً چار لاکھ افراد متاثر ہوئے اور 81,000 سے زیادہ لوگ اب بھی محفوظ پناہ گاہوں میں موجود ہیں۔
سڑکیں اور گھروں کے دروازے برف سے ڈھکے ہوئے ہیں اور بہت سے لوگ اپنی گاڑیوں اور گھروں میں پھنسے ہوئے ہیں، نیویارک کے شہر بفیلو میں برفانی تودہ گرنے سے 30 سے زائد افراد ہلاک ہونے کی اطلاعات ہیں۔
