کراچی : سفاک بھائی نے بہن کو ڈھائی سال سے ایک کمرے میں بند کر رکھا تھا، لڑکی برہنہ حالت میں غلاظت کے ڈھیر پر بیٹھی ملی۔
کراچی کےعلاقے رنچھوڑ لائن میں ڈھائی سال سے کمرے میں قید لڑکی کو بازیاب کرالیا گیا، لڑکی کو مبینہ طور پر اس کے بھائی اقبال نے قید کر رکھا تھا، پڑوسی خواتین چیخنے چلانے کی آواز پر فلیٹ میں داخل ہوئیں تو دل دہلا دینے والے مناظر تھے۔
پڑوسی خواتین گھرمیں داخل ہوئیں تو لڑکی برہنہ تھی، انہوں نے اس پر چادر ڈالی اور دلاسہ دیا، شاہین نامی لڑکی ڈھائی سال سے اس جہنم میں رہ رہی تھی، وہ سوکھ کر ہڈیوں کا ڈھانچہ بن چکی ہے۔
عمرچھتیس سالہ شاھین کا وزن صرف تیس سے پینتس کلو رہ گیا، پڑوسی کے مطابق فلیٹ میں بہن بھائی تنہا رہتےتھے، والدین کا انتقال ہوچکا ہے۔ ڈری اور سہمی ہوئی اتنی تھی کہ پڑوسیوں کی کسی بات کا سر ہلا کر بھی جواب نہ دیا۔
ابتدائی تحقیقات کے مطابق ملزم اقبال نے سگی بہن کو اس کمرے میں قید کر رکھا تھا، پڑوسی اور پولیس پہنچی تو کمرا غلاظت اور گندگی سے بھرا ہوا تھا، پولیس لڑکی کواسپتال لے آئی، جوس پلایا گیا لیکن کمزوری اور خوف کے باعث کچھ بھی بولنے سےقاصرتھی۔
ایک رشتہ دار خاتون نے پولیس کو بتایا کہ ملزم اقبال ان سے نہیں ملتا تھا، پولیس کا کہنا ہے کہ ملزم کا ریمانڈ لے کرمزید تفتیش کی جائے گی۔
