واشنگٹن: امریکی حکومت کو نادہندگی سے بچانے کے لیے امریکی سینیٹروں کے مابین معاہدہ طے پا گیا ہے۔
غیر ملکی میڈیا رپورٹ کے مطابق ڈیمو کریٹ پارٹی کی انتظامیہ کو مزید قرض لینے کی اجازت کے لیے قانون پاس کیا جائے گا، اس معاہدے کے نتیجے میں حکومت کو حزبِ اختلاف ری پبلکن پارٹی کے سینیٹرز کے ووٹ کی ضرورت نہیں رہے گی۔
ایوانِ نمائندگان قانون منظور کرچکا، آج سینیٹ میں پیش کیا جائے گا، ،جہاں منظوری ملنے کے بعد ڈیموکریٹس کو بل پاس کرنے میں ریپبلکن سینیٹروں کی ضرورت نہیں رہے گی اور ملک کو اس بحران سے نکالنے کے لیے سینیٹ میں 100 میں سے محض 51 ووٹ درکار ہوں گے۔
خبررساں اداروں کے مطابق بائی پارٹیزن پالیسی سینٹر نے گزشتہ ہفتے انتباہ جاری کیا تھا کہ ملک 21 دسمبر سے 28 جنوری کے دوران نادہندہ ہو سکتا ہے، نادہندگی کی صورت میں 60 لاکھ افراد کےبیروزگار ہونےکاخدشہ ہے اور مقامی طور پر 15 کھرب ڈالر کا نقصان ہو سکتا ہے۔
دوسری جانب ری پبلکن پارٹی کے ارکان نے اہم معاملے میں تعاون سے یہ کہہ کر انکار کردیا تھا کہ اس سب کی وجہ صدر بائیڈن کی جانب سے ٹیکس اور اخراجات بڑھانے کی ناقص پالیسی ہے۔
