’میں اور بیوی جھگڑتے ہیں، وہ میرے خواب میں آ کر خون پیتی ہے جس کی وجہ سے پوری رات نہیں سوتا، یہی وجہ ہے کہ دفتر وقت پر نہیں آتا۔‘
یہ بھارتی ریاست اتر پردیش کی پیرا ملٹری فورس پی اے سی کے ایک کانسٹیبل کی وضاحت ہے جو اس نے تاخیر سے دفتر پہنچنے پر ملنے والے نوٹس پر جاری کی۔
یہ نوٹس 44ویں بٹالین پی اے سی کے کمانڈر کو لکھا گیا جس میں اس سے اپنے کام میں غفلت برتنے پر جواب طلب کیا گیا۔
کانسٹیبل سے پوچھا گیا کہ وہ پیشگی ہدایات کے باوجود گزشتہ روز صبح 9 بجے کی ڈیوٹی بریفنگ کیلیے دیر سے دفتر کیوں پہنچا؟ نوٹس میں اس بات کی بھی وضاحت طلب کی گئی کہ کانسٹیبل نے شیو کیوں نہیں کروائی اور غلط یونیفارم کیوں پہنا؟
نوٹس کے مطابق کانسٹیبل نہ صرف اجتماعی کاموں کی انجام دہی میں تاخیر کر رہے تھے بلکہ دلچسپی بھی نہیں لے رہے تھے، کانسٹیبل نے انتہائی لاپرواہی، بے ضابطگی اور من مانی کا مظاہرہ کیا جو کہ پی اے سی میں ناقابل قبول ہے۔
نوٹس میں ہدایت کی گئی کہ وہ ایک دن کے اندر تحریری وضاحت آفس میں جمع کرائیں، ایسا نہ کرنے پر ان کے خلاف مزید تادیبی کارروائی کی جائے گی۔
کانسٹیبل نے اپنے جواب میں یہ غیر معمولی اور جذباتی وجہ لکھی۔
انہوں نے وضاحت کی کہ وہ 16 فروری 2025 کو ڈیوٹی کیلیے تاخیر سے پہنچے کیونکہ وہ ذاتی مسائل کی وجہ سے رات کو سو نہیں سکے۔
انہوں نے کہا کہ بیوی کے ساتھ شدید جھگڑا چل رہا ہے، وہ خواب میں آکر نہ صرف مجھے قتل کرنے کی کوشش کرتی ہے بلکہ خون بھی پیتی ہے، میں ڈپریشن اور چڑچڑے پن کی دوا لے رہا ہوں۔
انہوں نے یہ بھی بتایا کہ ان کی والدہ اعصابی بیماری میں مبتلا ہیں جس نے ان کی پریشانی کو مزید بڑھا دیا ہے۔
دریں اثنا، 44ویں بٹالین پی اے سی کے کمانڈنٹ ستیندر پٹیل نے کہا کہ وہ جواب کی تحقیقات کر رہے ہیں، یہ اسٹاف ممبر کون ہے؟ اس کے مسائل کیا ہیں؟ پورے معاملے کی چھان بین کی جا رہی ہے۔
