میئر کراچی کے لیے سابق صدر آصف زرداری، پیپلز پارٹی کے چیئرمین بلاول بھٹو اور فریال تالپور کے درمیان مشاورت ہوئی ہے۔
اے آر وائی نیوز کو ذرائع سے ملنے والی اطلاعات کے مطابق میئر کراچی کے لیے پیپلز پارٹی کے بڑوں میں مشاورت ہوئی ہے۔ اس مشاورتی عمل کی بیٹھک میں سابق صدر آصف علی زرداری، پی پی چیئرمین بلاول بھٹو زرداری اور فریال تالپور شریک تھے۔
ذرائع کا کہنا ہے کہ سابق ایڈمنسٹریٹر مرتضیٰ وہاب میئر کراچی کے لیے پیپلز پارٹی کے مضبوط امیدوار ہیں تاہم میئر کراچی کا حتمی فیصلہ اور نامزدگی کا اعلان بلاول بھٹو خود کریں گے۔
واضح رہے کہ کراچی میں بلدیاتی الیکشن میں پیپلز پارٹی پہلی بار شہر قائد میں سب سے زیادہ نشستیں جیت کر سب سے بڑی جماعت کے طور پر سامنے آئی ہے تاہم کوئی بھی سیاسی جماعت اپنا میئر لانے کے لیے واضح اکثریت حاصل نہیں کرسکی ہے۔
جماعت اسلامی اور پی ٹی آئی نے پیپلز پارٹی پر کراچی میں دھاندلی کے الزامات عائد کیے ہیں۔
