لاہور: سابق وزیراعظم نواز شریف کی صاحبزادی مریم نواز کی مشکلات میں اضافہ ہوگیا ، مریم نواز کےخلاف توہین عدالت کی درخواست دائر کردی گئی ، جس میں کہا گیا مریم نوازعدلیہ کی کردار کشی کر رہی ہیں، توہین عدالت کی کارروائی کی جائے۔
تفصیلات کے مطابق لاہور کا شہری سابق وزیراعظم نواز شریف کی صاحبزادی مریم نواز کے خلاف عدالت پہنچ گیا اور لاہور ہائیکورٹ میں مریم نواز کے خلاف توہین عدالت کی درخواست دائر کردی ، درخواست اظہرصدیق ایڈووکیٹ کی جانب سے دائرکی گئی۔
،درخواست میں مؤقف اختیار کیا گیا ہے کہ سپریم کورٹ کے فیصلے کے بعدمریم نواز نے توہین آمیز ٹوئٹس کئے،پیغامات میں عدلیہ کا مذاق اڑایا گیا، ایسے بیانات توہین عدالت کے زمرے میں آتے ہیں۔
درخواست گزار استدعا کی کہ مریم نوازعدلیہ کی کردار کشی کر رہی ہیں، مریم نواز کے خلاف توہین عدالت کی کارروائی عمل میں لائی جائے۔
مزید پڑھیں : عدالتی فیصلے سے قانون اورانصاف شرمندہ ہیں، مریم نواز کا ٹوئٹ
یاد رہے مریم نواز سماجی رابطے کی ویب سائٹ ٹوئٹر پر اپنے پیغام میں کئی بار عدلیہ کو تنقید کا نشانہ بنا چکی ہے۔
مریم نواز نے سپریم کورٹ کے تفصیلی فیصلے پر تنقید کرتے ہوئے کہا ہے کہ قانون اورانصاف شرمندہ ہیں اسی طرح اقلیت اکثریت کو بدنام کرتی ہے، شکارنوازشریف نہیں نظام عدل ہے۔
