پشین : بلوچستان کےعلاقے پشین میں نامعلوم افراد کی جانب سے انسداد پولیوٹیم پر حملے کے نتیجے میں پولیس اہلکار جاں بحق ہوگیا۔
تفصیلات کے مطابق بلوچستان کےعلاقے پشین میں نامعلوم افراد نے انسداد پولیوٹیم پر حملہ کردیا، اس دوران فائرنگ سے پولیس اہلکار جاں بحق ہوگیا۔
ڈی سی پشین کا کہنا ہے جاں بحق اہلکار کی شناخت حوالدار محمد ہاشم کے نام سے ہوئی تاہم فائرنگ سے انسداد پولیو ٹیم کے رضاکار محفوظ رہے۔
وزیراعلیٰ بلوچستان میر عبدالقدوس بزنجو نے پشین میں انسدادپولیو ٹیم کی ڈیوٹی پر تعینات اہلکار پر فائرنگ کی مذمت کرتے ہوئے واقعےکی رپورٹ طلب کرلی ہے۔
وزیراعلیٰ بلوچستان نے واقعے میں ملوث عناصر کوقانون کی گرفت میں لانے کی ہدایت کرتے ہوئے کہا کہ پولیو رضا کاروں کی فول پروف سیکیورٹی کوہر قیمت پر یقینی بنایاجائے۔.
میر عبدالقدوس بزنجو نے شہید پولیس اہلکار کے خاندان سے تعزیت اور ہمدردی کا اظہار کیا۔
دوسری جانب وزیراعلیٰ سندھ سید مراد علی شاہ نے پشین میں انسدادپولیو ٹیم پر حملےکی مذمت کرتے ہوئے کہا کہ یہ لوگ ہمارے مستقبل کے معماروں کے دشمن ہیں، دہشت گرد چاہتے ہیں ہماری نئی نسلیں معذور ہوں، ہمیں اس قسم کے لوگوں اور انکی سوچ کا مقابلہ کرنا ہوگا۔
