بیجنگ: عالمی سطح پر کرونا کے بڑھتے وار کے باعث ایشین یوتھ گیمز کو ملتوی کردیا گیا ہے۔
چینی اولمپک کمیٹی(سی او سی) نے اعلان کیا کہ نوول کرونا وائرس کی عالمی وبا کے باعث ایشین یوتھ گیمز دو ہزار اکیس کو دسمبر دو ہزار بائیس تک ملتوی کر دیا گیا ہے۔
چینی اولمپک کمیٹی کی جانب سے جاری بیان میں کہا گیا کہ تیسری ایشین یوتھ گیمز کا انعقاد بیس سے اٹھائیس نومبر دو ہزار اکیس تک چین کے جنوبی صوبہ گوانگ ڈونگ کے شانتو میں کیا جانا تھا، شانتو کو دو ہزار انیس میں تیسری ایشیائی یوتھ گیمز کی میزبانی کرنے کا حق ملا تھا۔
نئے شیڈول کے مطابق اب یہ گیمز بیس سے اٹھائیس دسمبر دو ہزار بائیس کو منعقد ہوں گی۔
اولمپکس کونسل آف ایشیا نے مزید کہا کہ ایشین یوتھ گیمز کو ملتوی کرنے کا فیصلہ تمام متعلقہ قومی اولمپک کمیٹیوں کے مشترکہ مفادات، کھلاڑیوں اور تمام شرکاء کی صحت کی حفاظت کو یقینی بنانے کیلئے کیا گیا ہے۔
