کویت : ریاست بحرین نے کورونا وائرس کے پھیلاؤ کے پیش نظر بند کیے گئے ریسٹورنٹس اور فٹنس سینٹرز کھولنے کے ساتھ ساتھ اسکولوں کو بھی کھولنے کا اعلان کردیا ہے۔
تفصیلات کے مطابق ریاست بحرین نے ریستوران اور جمز کے لئے داخلی خدمات کو دوبارہ شروع کرنے کا اعلان کردیا ہے جبکہ اسکولوں کو بھی دوبارہ کھولنے کی اجازت دے دی گئی ہے۔
بحرین میں قومی میڈیکل ٹیم برائے کورونا وائرس رسپانس نے کل بروز اتوار 14 مارچ 2021 سے ریاست کے کچھ شعبوں کو دوبارہ کھولنے کا اعلان کردیا ہے۔
فیصلے کے مطابق ریستوران اور کیفے کی داخلی خدمات کو دوبارہ شروع کرنے کی اجازت دی گئی ہے بشرطیکہ ہر سہولت میں زیادہ سے زیادہ 30 افراد خدمات انجام دے سکتے ہیں۔ فیصلے کے مطابق انڈور جم اور سوئمنگ پول بھی دوبارہ کھولنے کی اجازت ہے۔
طلباء کو سرکاری اور نجی اسکولوں، اعلیٰ تعلیمی اداروں، یونیورسٹیوں، کنڈر گارٹنز، نرسریوں، تربیتی مراکز اور اداروں میں جانے کی اجازت دینے کا بھی فیصلہ جاری کیا گیا تاہم اسکولوں میں جانے کا انتخاب والدین اور طلباء و طالبات پر چھوڑ دیا گیا ہے۔
اس فیصلے میں 30 سے زائد افراد کے ساتھ گھروں اور نجی مقامات پر تمام سماجی اجتماعات یا نجی تقریبات کے انعقاد پر پابندی عائد کرنے کی تصدیق کی گئی ہے۔
