واشنگٹن : امریکی صدر ڈونلڈ ٹرمپ نے کورونا وائرس کو نظرانداز کرنے کی میڈیا رپورٹس مسترد کردیں، ملک میں ہلاکتوں کی تعداد 340ہوگئی،26ہزار سے زائد افراد تاحال متاثر ہیں۔
تفصیلات کے مطابق امریکی صدر ڈونلڈ ٹرمپ نے کہا ہے کہ حکومت نے کورونا وائرس سے نمٹنے کے سلسلے میں کسی قسم کی تاخیر نہیں کی، بلاجواز تنقید کی جارہی ہے، کورونا وائرس کو نظرانداز کرنے کی میڈیا رپورٹس مسترد کرتے ہیں۔
واضح رہے کہ امریکی میڈیا نے اپنی رپورٹس میں کہا ہے کہ صدرٹرمپ نے کوروناوائرس پر ابتدائی رپورٹس کو سنجیدہ نہیں لیا تھا، امریکی خفیہ ایجنسیز کی جانب سے کورونا وائرس کے متعلق جنوری اور پھر فروری میں خبردار کیا گیا تھا۔
خفیہ ایجنسیز نے صدرٹرمپ کو اپنی تشویش سے بھی آگاہ کیا تھا، ٹرمپ نے25فروری کو ٹویٹر پیغام میں بھی صورتحال کنٹرول میں ہونے کا دعویٰ کیا جبکہ اب تک کورونا وائرس سے امریکا میں340افراد ہلاک اور26ہزار سے زائد کیسز سامنے آچکے ہیں۔
مزید پڑھیں: ٹرمپ نے کرونا وائرس کو ‘چینی وائرس’ کا نام دے دیا
اس کے علاوہ ،ڈیموکریٹ پارٹی کے ممکنہ صدارتی امیدوار جوبائیڈن نے بھی امریکی صدر کو اپنی تنقید کا نشانہ بناتے ہوئے کہا ہے کہ ٹرمپ جانتے ہیں وہ ناکام ہوچکے ہیں۔
