برلن : جرمنی کے وزیر صحت نے کہا ہے کہ کورونا وائرس کے لیے ویکسین تیار کرنے میں کئی سال لگ سکتے ہیں، ویکسین کی تیاری سب سے زیادہ مشکل اور چیلنجنگ کام ہے۔
غیر ملکی خبر رساں ادارے کے مطابق جرمن وزیر صحت جینس اسفہان نے کہا ہے کہ ان کو انتہائی خوشی ہوگی اگر ویکسین اگلے چند ماہ میں تیار ہو جائے۔
انہوں نے کہا کہ مشکلات آڑے آنے کی صورت میں ویکسین کی تیاری میں کئی سال بھی لگ سکتے ہیں، جیسا کہ دیگر ویکسینز کی تیاری میں دیکھنے میں آیا ہے ان کا کہنا ہے کہ ادویات میں ویکسین کی تیاری سب سے زیادہ مشکل اور چیلنجنگ کام ہے۔
دوسری جانب امریکی صدر ڈونلڈ ٹرمپ نےیہ دعویٰ کیا ہے کہ امریکہ رواں سال کے آخر تک کورونا وائرس سے بچاؤ کی ویکسین بنانے میں کامیاب ہو جائے گا۔
گزشتہ روز ورچوول ٹاؤن ہال میٹنگ کے دوران گفتگو میں انہوں نے کہا کہ امریکی سائنسدان اس سال کے آخر تک کورونا وائرس کے علاج سے متعلق ویکسین تیار کرلیں گے اور مجھے خوشی ہوگی اگر کوئی ملک ویکسین کی تیاری میں امریکی ماہرین کوشکست دینے میں کامیاب ہوجائے۔
واضح رہے اس سال کے شروع میں جب امریکہ میں کورونا وائرس پھیل گیا تو امریکی ماہر انتھونی فاؤچی اور دوسرے طبی ماہرین نے کہا تھا کہ ایک ویکسین تیار کرنے میں 12 سے 18 ماہ کے درمیان کا وقت لگے گا۔
دنیا بھر میں اب تک کورونا وائرس کے متاثرین کی تعداد 35 لاکھ سے تجاوز کرگئی ہے، روس میں گزشتہ 24 گھنٹوں کے دوران کورونا کے 10 ہزار سے زائد نئے کیسز رپورٹ ہوئے ہیں جس کے بعد ملک میں کورونا کے متاثرین کی کل تعداد ایک لاکھ 45ہزار 268 ہوگئی ہے، روس میں اب تک کورونا سے ایک ہزار 356 افراد ہلاک ہوچکے ہیں۔
