دیر: جماعت اسلامی نے کورونا وائرس کے پیش نظر 2 ہفتے کے لیے تمام سیاسی سرگرمیاں معطل کرنے کا اعلان کردیا۔
اے آر وائی نیوز کی رپورٹ کے مطابق امیر جماعت اسلامی سراج الحق نے دیر جلسے میں کورونا وائرس کے پیش نظر 2 ہفتے کے لیے تمام سیاسی سرگرمیاں معطل کرنے کا اعلان کیا۔
سراج الحق نے کہا کہ اگلے مرحلے میں جماعت اسلامی پنجاب میں جلسہ کرے گی، تحریک کا دوبارہ آغاز گوجرانوالہ سے ہوگا۔
واضح رہے کہ پی ڈی ایم کی جانب سے کل ملتان میں جلسہ کرنے کا اعلان کیا گیا ہے جبکہ پنجاب حکومت نے کورونا کے پیش نظر جلسے کی اجازت نہ دینے کا فیصلہ کیا ہے۔
کورونا کے پھیلاؤ کے خطرے کے پیش نظر
آج دیر جلسہ عام میں جماعت اسلامی کی سیاسی و عوامی سرگرمیوں کو آئندہ دو ہفتوں کے لیے معطل کرنے کا اعلان کیا
تحریک کے اگلے مرحلے میں جماعت اسلامی پنجاب میں جلسے کرے گی۔ آغاز گوجرانوالہ سے ہوگا۔ ان شاء اللہ pic.twitter.com/iSPagxRJbh— Siraj ul Haq (@SirajOfficial) November 29, 2020
یاد رہے کہ ملک میں گزشتہ 24 گھنٹوں کے دوران کورونا وائرس کی وجہ سے مزید 43 افراد جاں بحق ہو گئے۔
نیشنل کمانڈ اینڈ آپریشن سینٹر کے مطابق ملک میں 24 گھنٹوں کے دوران مزید 2 ہزار 829 کورونا کیسز رپورٹ ہوئے، جس سے ملک میں کورونا کے مصدقہ کیسز کی تعداد 3 لاکھ 95 ہزار 185 ہو گئی۔
ملک میں 24 گھنٹوں کے دوران کرونا وائرس سے مزید تیتالیس افراد کے انتقال کے بعد پاکستان میں کورونا سے انتقال کرنے والوں کی تعداد 7 ہزار 985 ہو گئی ہے، جب کہ 2 ہزار 186 مریضوں کی حالت تشویش ناک ہے۔
