The news is by your side.

Advertisement

اسلام آباد : کورونا وائرس کو شکست دینے والے مریضوں کی تعداد میں نمایاں اضافہ

اسلام آباد : وفاقی دارالحکومت میں کورونا وائرس میں مبتلا 80فیصد مریض صحت یاب ہوگئے، جس کے بعد وبا سے صحتیاب افراد کی تعداد11ہزار 332 ہوگئی۔

تفصیلات کے مطابق پاکستان کے دارالحکومت اسلام آباد میں کورونا وائرس کو شکست دینے والوں کی تعداد میں حیرت انگیز اضافہ ہوا ہے، وائرس سے متاثرہ 80فیصد مریض صحت یاب ہوچکے ہیں۔

ڈسٹرکٹ ہیلتھ آفیسر (ڈی ایچ او) کے مطابق وفاقی دارالحکومت میں کورونا مریض تیزی سے صحت یاب ہونے لگے ہیں، ڈی ایچ او اسلام آباد نے کورونا کیسز کے بارے میں تفصیلات جاری کرتے ہوئے بتایا ہے کہ اسلام آباد میں 80 فیصد کورونا مریض صحتیاب ہو چکے ہیں۔

ڈی ایچ او اسلام آباد کے مطابق  رواں سال24جون کے بعد صحتیاب افراد کی تعداد میں نمایاں اضافہ ہوا ہے، اسلام آباد میں کورونا کیسز کی کل تعداد 14ہزار 202 ہے جس میں سے اب تک11 ہزار 332 مریض صحت یاب ہوچکے ہیں۔

ڈسٹرکٹ ہیلتھ آفیسر کا کہنا ہے کہ اسلام آباد میں کورونا کے ایکٹو کیسز کی تعداد2 ہزار 717 ہے،24گھنٹے میں 94 نئے کیس سامنے آئے ہیں،24گھنٹے میں اسلام آباد میں 222 مریض ڈسچارج ہوئے اسلام آباد میں کورونا سے 155 مریض جاں بحق ہو چکے ہیں۔

Comments

یہ بھی پڑھیں