ریاض : سعودی عرب کے وزیر صحت ڈاکٹر توفیق الربیعہ نے کہا ہے کہ ابھی یہ فیصلہ نہیں کیا جاسکتا کہ کورونا وائرس کرونا وائرس سے بچاﺅ کیلیے کی جانے والی احتیاطی تدبیر کب ختم ہوں گی۔
سعودی خبررساں ادارے کے مطابق وزیر صحت ڈاکٹر توفیق الربیعہ نے پریس کانفرنس سے خطاب کرتے ہوئے اس بات کی وضاحت کی ہے کہ اس بات کا تعین نہیں کیا جاسکتا کہ کورونا وائرس کی روک تھام کیلئے کیے گئے اقدامات اور احتیاطی تدابیر پر عمل درآمد کب ختم کیا جائے گا اور اس کی تاریخ کا تعین کرنا بہت مشکل ہے۔
انہوں نے کہا کہ کورونا وائرس سے متعلق احتیاطی تدابیر کا مسلسل جائزہ لیا جارہا ہے جب ان کی ضرورت ختم ہوگی پہلی فرصت میں انہیں اٹھائے جانے کا اعلان کردیا جائے گا۔
سعودی وزیر صحت نے بتایا کہ کورونا وائرس عالمی وبا ہے۔ اس کا خاتمہ کب ہوگا اس سلسلے میں توقعات سے کام نہیں لیا جاسکتا۔ ہمارا خیال ہے کہ یہ وائرس ان ممالک میں زیادہ پھیل رہا ہے جہاں اس سے بچاﺅ کی تدابیر نہیں کی گئیں۔
انہوں نے مزید کہاکہ کورونا وائرس کی نگراں کمیٹی احتیاطی تدابیر کا انتہائی پابندی سے جائزہ لے رہی ہے، وہی طے کرے گی کہ احتیاطی تدابیر کب تک جاری رہیں گی اور کب انہیں اٹھایا جائے گا۔
