اسلام آباد: پاکستان میں کرونا وائرس کے کیسز اور اموات میں کمی کا رجحان جاری ہے، نیشنل کمانڈ اینڈ آپریشن سینٹر کا کہنا ہے کہ گزشتہ 24 گھنٹوں کے دوران کرونا وائرس کے 10 مریض انتقال کر گئے جبکہ 586 نئے کیسز کی تصدیق ہوئی ہے۔

تفصیلات کے مطابق نیشنل کمانڈ اینڈ آپریشن سینٹر کا کہنا ہے کہ ملک میں گزشتہ 24 گھنٹوں کے دوران کرونا وائرس کے 10 مریض انتقال کر گئے جس کے بعد ملک میں کرونا وائرس سے ہلاکتوں کی مجموعی تعداد 6 ہزار 231 ہوچکی ہے۔

گزشتہ 24 گھنٹوں کے دوران سندھ میں 7، پختونخواہ میں 1 اور بلوچستان میں 2 مریضوں جاں بحق ہوئے۔

این سی او سی کا کہنا ہے کہ گزشتہ 24 گھنٹے میں ملک میں کرونا وائرس کے 586 نئے کیسز رپورٹ ہوئے ہیں جس کے بعد ملک میں کرونا وائرس کے مجموعی کیسز کی تعداد 2 لاکھ 92 ہزار 174 ہوگئی ہے۔

این سی او سی کے مطابق ملک میں کرونا وائرس کے فعال کیسز کی تعداد 10 ہزار 626 ہے، اب تک 2 لاکھ 75 ہزار 317 کرونا وائرس مریض صحتیاب ہو چکے ہیں۔

ملک میں گزشتہ 24 گھنٹے کے دوران 25 ہزار 537 کرونا وائرس کے ٹیسٹ کیے گئے، ملک بھر میں کیے گئے مجموعی ٹیسٹس کی تعداد 24 لاکھ 14 ہزار 902 ہوچکی ہے۔

کرونا وائرس کے مریضوں کے لیے مختص 1920 وینٹی لیٹرز میں سے 138 پر مریض موجود ہیں، ملک بھر کے 735 اسپتالوں میں 11 سو 88 کرونا وائرس کے مریض زیر علاج ہیں۔

دوسری جانب ڈاکٹرز اور ماہرین پاکستان میں کرونا وائرس کی نئی لہر کا اندیشہ ظاہر کر رہے ہیں جس کے پیش نظر احتیاطی تدابیر پر عملدر آمد پر سختی کا اعلامیہ جاری کیا گیا ہے۔