لاہور: مسلم لیگ ن کے صدر شہباز شریف نے کروناوائرس کے پیش نظر ملک میں لاک ڈاؤن کا مطالبہ کردیا۔
تفصیلات کے مطابق اپنے ایک بیان میں اپوزیشن لیڈر شہباز شریف کا کہنا تھا کہ کرونا سے بڑھتے خطرات پر لاک ڈاؤن کیا جائے، حکومت فوری لاک ڈاؤن کی تیاریاں کرے۔
انہوں نے کہا کہ خوراک کی فراہمی سمیت دیگر انتظامات کو حتمی شکل دی جائے، چین کی طرز پر پاکستان میں لاک ڈاؤن کے لیے انتظامات کیےجائیں، تاخیر کی صورت بھیانک انسانی المیہ ناقابل قبول ہوگا۔
قبل ازیں وزیراعظم کے معاون خصوصی معیدیوسف کا پریس کانفرنس کرتے ہوئے کہنا تھا کہ ابھی تک لاک ڈاؤن کا کوئی فیصلہ نہیں ہوا، خدارا افواہیں نہ پھیلائیں، لاک ڈاؤن جیسی افواہوں پر مبنی خبروں سے صورت حال خراب ہوسکتی ہے۔
‘ابھی تک لاک ڈاؤن کاکوئی فیصلہ نہیں ہوا،خداراافواہیں نہ پھیلائیں’
ان کا یہ بھی کہنا تھا کہ کل نیشنل کوآرڈینیشن کمیٹی قائم کی گئی، کروناوائرس سے نمٹنے کے لیے مرکزی سطح پر کام کرنے کی ضرورت ہے، کمیٹی کرونا وائرس کی صورتحال پر نظر رکھے گی۔
خیال رہے کہ ملک میں مہلک وائرس کے مریضوں کی تعداد 500 سے تجاوز کرچکی ہے۔
