مانچسٹر : برطانوی نیوی کمانڈر کو لاک ڈاؤن کی خلاف ورزی پر نوکری سے برطرف کر دیا گیا، ترجمان کا کہنا ہے کہ محکمانہ انکوائری کے بعد اُن کے مستقبل کا فیصلہ ہو گا، جرم ثابت ہونے پر نوکری سے برخاست بھی کیا جا سکتا ہے۔
تفصیلات کے مطابق برطانوی نیوی کمانڈر کو لاک ڈاؤن میں بار بی کیو کرنا مہنگا پڑ گیا ، رائل نیوی جوہری سب مرین کے کمانڈر کو لاک ڈاؤن کی خلاف ورزی پر برطرف کر دیا گیا۔
کمانڈر جان لوئس نے اپنے عملے کے لیے بار بی کیو کا اہتمام کیا ، جس کے بعد اُنہیں شپ کمانڈر کے عہدے سے ہٹاکر معاملہ کی انکوائری شروع کردی گئی ہے۔
محکمانہ انکوائری کے بعد اُن کے مستقبل کا فیصلہ ہو گا ، کمانڈر جان لوئس کو ڈیوٹی سے ہٹا کر گھر بھیج دیا گیا ہے۔
بحریہ کے ترجمان نے برطانوی میڈیا کو کمانڈر کی برطرفی کی تصدیق کر دی اور کہا جرم ثابت ہونے پر نوکری سے برخاست بھی کیا جا سکتا ہے، کمانڈر لوئس کو ویڈیو کلپ میں باربی کیو کرتے اور موبائل سے اونچی آواز میں میوزک سُنتے دیکھا گیا، اُنہوں نے ایک سال قبل ہی جوہری بیڑے کی کمان سنبھالی تھی۔
خیال رہے انتہائی مہلک ثابت ہونے والی کو وِڈ نائنٹین کی عالمگیر وبا نے 31 لاکھ 38 ہزار سے زائد انسانوں کو لپیٹ میں لے لیا ہے، وائرس میں مبتلا ہو کر اب تک 2 لاکھ 17 ہزار 985 افراد ہلاک ہو چکے ہیں۔
برطانیہ بھی شدید متاثرہ ممالک میں سے ایک ہے، جہاں گزشتہ چوبیس گھنٹوں کے دوران 686 مریض مر چکے ہیں، اور وائرس اب تک 21,678 افراد کی جانیں لے چکا ہے، متاثرہ افراد کی تعداد بھی 1 لاکھ 61 ہزار سے بڑھ گئی ہے، برطانیہ نے تاحال صحت یاب ہونے والے مریضوں کا ڈیٹا جاری نہیں کیا ہے، تاہم بتایا جا رہا ہے کہ برطانیہ میں کرونا کے مریضوں کی صحت یابی کا گراف نہایت کم ہے۔
