کراچی: وفاقی حکومت نے کاٹن سیزن 25۔2024 کے لیے کپاس کا پیداواری ہدف ایک کروڑ 8 لاکھ بیلز مقرر کر دیا۔
تفصیلات کے مطابق گزشتہ برس کپاس کا پیداواری ہدف 12.27 ملین بیلز تھا جب کہ پیداوار 10 ملین بیلز کے قریب رہی تھی، رواں برس کے لیے حکومت نے ہدف 10.08 ملین بیلز مقرر کر دیا ہے۔
چیئرمین کاٹن جنرز فورم احسان الحق کے مطابق وفاقی حکومت نے ابھی تک کپاس کی امدادی قیمت کا تعین نہیں کیا، جس کی وجہ سے کاشت کاروں میں تشویش کی لہر ہے، موسمی حالات کے باعث ملک بھر میں کپاس کی کاشت کافی متاثر ہے۔
احسان الحق نے کہا کہ سندھ کے ساحلی شہروں میں کپاس کی جزوی چنائی شروع ہو گئی ہے، اور کپاس کی نئی فصل کے سودے 10 ہزار روپے فی 40 کلو گرام تک ہو رہے ہیں، جب کہ روئی کی نئی فصل کے سودے 21 ہزار روپے فی من تک ہو رہے ہیں۔
ان کا کہنا تھا کہ پنجاب میں گندم کے سنگین بحران کے باعث کپاس کی کاشت بھی متاثر ہونے کا خدشہ ہے۔
انجم وہاب اے آر وائی نیوز سے وابستہ ہیں اور تجارت، صنعت و حرفت اور دیگر کاروباری خبریں دیتے ہیں