پیرو: طیارہ حادثہ میں زندہ بچ جانے والے افراد عام طور سے اتنے دہشت زدہ ہوتے ہیں کہ کچھ سوچنے سمجھنے کے قابل ہی نہیں ہوتے، لیکن پیرو میں طیارہ حادثے کے بعد ایک جوڑے کو سیلفی لینے کی سوجھی، جو سوشل میڈیا پر آتے ہی وائرل ہو گئی۔
غیر ملکی میڈیا رپورٹس کے مطابق پیرو کے شہر لیما کے جارج شاویز بین الاقوامی ایئرپورٹ سے جمعہ کو سہ پہر ایک طیارہ اڑان بھرنے ہی والا تھا جب ایک فائر ٹرک اس سے ٹکرا گیا۔
اس حادثے میں رن پر موجود دو فائر فائٹرز ہلاک ہو گئے تھے، تاہم طیارے میں سوار کوئی مسافر یا عملے کو کوئی نقصان نہیں پہنچا تھا، فائر ٹرک کے طیارے سے ٹکرانے کی وجہ سے جہاز کو شدید نقصان پہنچا تھا۔
Cuando la vida te da una segunda oportunidad #latam pic.twitter.com/Vd98Zu98Uo
— Enrique Varsi-Rospigliosi (@enriquevarsi) November 18, 2022
اکثر ایسے حادثات میں بچ جانے والے مسافر اگر فون نکالتے بھی ہیں تو اپنے پیاروں کے ساتھ بات کرنے کے لیے، لیکن اس جوڑے نے تباہ شدہ طیارے کے ساتھ ایک تصویر لینے کے لیے موبائل فون کا استعمال کیا۔
تصویر میں نظر آنے والے شخص اینرک وارسی نے تصویر کے کیپشن شیئر کرتے ہوئے لکھا ’’جب زندگی آپ کو دوسرا موقع دیتی ہے۔‘‘
یہ تصویر تیزی سے سوشل میڈیا پر وائرل ہوئی، فیس بک پر ایئربس 320 کے پیج پر بھی اس تصویر کو شیئر کیا گیا اور لکھا گیا ’’سال کی بہترین سیلفی، خوشی ہے کہ وہ خیریت سے ہیں۔‘‘
تاہم دوسری طرف کچھ صارفین نے اسے مضحکہ خیز قرار دیا، بہت سے لوگوں نے کہا کہ جوڑے کو یہ احساس ہونا چاہیے تھا کہ جب وہ تصاویر کلک کر رہے تھے تو ان کی زندگیاں داؤ پر لگی تھیں۔
ایک شخص نے لکھا کہ فائر فائٹرز کے لواحقین کے لیے یہ بہت دکھ کی بات ہے، شاید تصویر میں نظر آنے والے جوڑے کو ہلاکتوں کا علم نہیں تھا یا شاید وہ خود بچ جانے سے بہت مطمئن تھے۔
