مغربی بنگال: بھارت میں سفاک ماں باپ نے آئی فون خریدنے کے لیے اپنے 8 ماہ کے بچے کو بیچ دیا۔
یہ واقعہ بھارت کی ریاست مغربی بنگال میں پیش آیا، جہاں ایک جوڑے نے مبینہ طور پر انسٹاگرام ریلز بنانے کے لیے ایک آئی فون 14 خریدنے کے لیے اپنے 8 ماہ کے بچے کو فروخت کر دیا۔
بھارتی رپورٹس میں یہ بھی الزام لگایا گیا ہے کہ باپ نے اپنی 7 سالہ بیٹی کو بھی فروخت کرنے کی کوشش کی تاہم پولیس نے بچی کو بچا لیا اور بچہ خریدنے والی خاتون کو گرفتار کر لیا۔
رپورٹ میں بتایا گیا کہ بیٹے کو بیچنے کے بعد جے دیو نے آدھی رات کو بیٹی کو بھی بیچنے کی کوشش کی، پڑوسیوں نے پولیس کو اطلاع دی جس کے بعد پولیس نے جے دیو کو گرفتار کر لیا ہے۔
میڈیا رپورٹس میں مقامی لوگوں کا کہنا ہے کہ جے دیو اور اسکی بیوی اکثر نشے میں رہتے تھے، جس کی وجہ سے خاندان اور پڑوسیوں میں شدید جھگڑے ہوتے تھے۔
رپورٹ کے مطابق پڑوسی نے بچہ لاپتہ ہونے اور سفاک جوڑے کے پاس آئی فون دیکھنے کے بعد پولیس کو اطلاع دی جس کے بعد پولیس نے تحقیقات شروع کی تھی۔
جب پولیس نے تفتیش کی تو ماں نے اعتراف کیا کہ انہوں نے بچے کو فروخت کیا اور اس رقم کو مغربی بنگال کے مختلف حصوں میں انسٹاگرام ریلز بنانے کے لیے استعمال کیا۔
