راولپنڈی : احتساب کی خصوصی عدالت نے 190 ملین پاؤنڈ کیس میں بانی پی ٹی آئی کی اہلیہ بشری بی بی کی عبوری ضمانت منظور کرلی۔
تفصیلات کے مطابق احتساب کی خصوصی عدالت کے جج محمد علی وڑائچ نے اڈیالہ جیل میں 190 ملین پاؤنڈ کیس کی سماعت کی، بشریٰ بی بی اور بانی پی ٹی آئی دوران سماعت کمرہ عدالت میں موجود تھے۔
بشریٰ بی بی اور بانی پی ٹی آئی کے وکلاء ظہیر عباس چودھری، عثمان گل، بیرسٹر سلمان صفدر و دیگر عدالت میں پیش ہوئے جبکہ نیب کے پراسیکیوٹر جنرل سردار مظفر عباسی، امجد پرویز ٹیم کے ہمراہ پیش ہوئے۔
سماعت کے دوران استغاثہ کے تین گواہان کے بیان قلم بند ہوئے اور عدالت نے آئندہ سماعت پر مزید تین گوہان کو طلب کر لیا۔
دوران سماعت ضمانت قبل از گرفتاری کی درخواست پر بشریٰ بی بی کے وکیل بیرسٹر سلمان صفدر نے دلائل دیئے، عدالت میں نیب ٹیم نے بشریٰ بی بی کی ضمانت کی مخالفت نہیں کی اور بتایا بشریٰ بی بی کے وارنٹ گرفتاری جاری ہی نہیں ہوئے ہیں۔
احتساب کی خصوصی عدالت نے 190 ملین پاؤنڈ کیس میں بشری بی بی کی عبوری ضمانت منظور کرلی ، احتساب عدالت کےجج محمد علی وڑائچ نے بشری بی بی کی درخواست ضمانت منظور کی۔
بعد ازاں بانی پی ٹی آئی اور بشری بی بی کے خلاف 190 بلین پاؤنڈ کیس کی سماعت پانچ جولائی تک ملتوی کردی گئی۔
یاد رہے مئی میں 190 ملین پاؤنڈ نیب ریفرنس کیس میں اسلام آباد ہائی کورٹ نے بانی پی ٹی آئی کی ضمانت منظور کی تھی، چیف جسٹس اسلام آباد ہائی کورٹ عامر فاروق اور جسٹس طارق محمود جہانگیری پر مشتمل دو رکنی بینچ نے ضمانت کی درخواست پر محفوظ فیصلہ سنا دیا تھا۔
