لاہور : انسداد دہشت گردی کی عدالت نے تحریک لبیک پاکستان کے 40 کارکنان کی ضمانتیں منظور کرلیں ، ٹی ایل پی کے کارکنان کو ہفتہ کے روز جوڈیشل ریمانڈ پر جیل بھجوایا گیا تھا۔
تفصیلات کے مطابق لاہور کی انسداد دہشت گردی کی عدالت میں تحریک لبیک پاکستان کے 40 گرفتار کارکنان کی درخواست ضمانت پر سماعت ہوئی ، دوران سماعت عدالت نے 40کارکنان کی ضمانت کی درخواستیں منظورکر لیں۔
عدالت نے تحریک لبیک پاکستان کے 40 کارکنان کی ایک ایک لاکھ کے ضمانتی مچلکوں کے عوض رہائی کا حکم دیا۔
ٹی ایل پی کے 40کارکنان کو ہفتہ کے روزجوڈیشل ریمانڈ پر جیل بھجوایا تھا اور تفتیشی افسر کو کیس کا چالان پیش کرنے کی ہدایت کی تھی۔
واضح رہے کہ پولیس نے مذکورہ گرفتار ملزمان کیخلاف انسداد دہشت گردی سمیت دیگر دفعات کے تحت مقدمات درج کر رکھے ہیں۔
