لاہور : پولیس نے طالب علم بدفعلی کیس میں ملزم مفتی عزیز الرحمان کی درخواست ضمانت خارج کرنے کی استدعا کردی ، جس پر فریقین کے وکلا کو دلائل کے لیے طلب کرلیا۔
تفصیلات لاہور میں کینٹ کچہری میں طالب علم سے بدفعلی کیس میں ملزم مفتی عزیز الرحمان کی درخواست ضمانت پر سماعت ہوئی ، دوران سماعت پولیس نے ملزم عزیزالرحمان کا ریکارڈ پیش کردیا۔
تفتیشی رپورٹ میں بتایا ہے کہ ملزم تفتیش میں قصوروار پایا گیا اور استدعا کی گئی کہ ملزم کی درخواست ضمانت خارج کی جائے ، جس پر عدالت نے فریقین کے وکلا کو دلائل کے لیے طلب کرلیا، بعد ازاں عدالت نے سماعت 2بجے تک ملتوی کردی۔
یاد رہے مفتی عزیز الرحمن کی نازیبا ویڈیو لیک ہونے پر پولیس نے بدفعلی کا شکار ہونے والے نوجوان صابر شاہ کی درخواست پر مقدمہ درج کیا تھا، طالبعلم صابر شاہ کی مدعیت میں درج کئے گئے مقدمات میں 337 اور 506 کی دفعات شامل کی گئیں۔
مقدمے میں یہ الزام لگایا گیا تھا کہ مفتی عزیز الرحمن نے اسے امتحانات میں فیل کرکے بلیک میل کیا ، امتحانات میں پاس کروانے کا لالچ دیکر مبینہ طور پر کئی ماہ تک بد فعلی کی، شکایات کرنے پر اس کی کوئی شنوائی نہ ہوئی۔
ویڈیو وائرل ہونے پر پولیس نے مفتی عزیزالرحمن ، انکے تین بیٹے اور تین نامعلوم افراد کے خلاف مقدمہ درج کیا ، جس کے بعد پولیس نے مفتی عزیز الرحمن اور ان کے ایک بیٹے کو گرفتار کرلیا تھا۔
