مظفر آباد :عدالت نے شاعر احمد فرہاد کو جیل منتقل کرنے کا حکم دیتے ہوئے 24 جون کو دوبارہ پیش کرنے کا حکم دے دیا۔
تفصیلات کے مطابق شاعر احمد فرہاد کو ریمانڈ مکمل ہونے پر پولیس نے انسداد دہشت گردی کی عدالت میں پیش کردیا۔
مظفرآبادپولیس نے عدالت میں مؤقف اپنایا شاعر سے تفتیش کا عمل مکمل ہو چکا ہے۔
پولیس نے نامکمل چالان عدالت میں پیش کیا ، جس پر عدالت نے پولیس ریمانڈ مکمل ہونے پر شاعر کو جیل منتقل کرنے کا حکم دیتے ہوئے کہا کہ 24جون کو دوبارہ پیش کیا جائے۔
یاد رہے 5 جون کو انسداد دہشت گردی کی عدالت نے شاعر کی درخواست ضمانت مسترد کی تھی ، جس پر اہلیہ کا کہنا تھا ہم اس فیصلے کو چیلنج کریں گے۔
واضح رہے 9 مئی کو وفاقی حکومت نے شاعر احمد کی گرفتاری ظاہر کی تھی اور اٹارنی جنرل نے عدالت کو بتایا تھا کہ وہ گرفتار اور پولیس کسٹڈی میں ہے۔
بعد ازاں پولیس نے بتایا تھا کہ شاعر احمد دفعہ اے پی سی 186کے تحت گرفتار ہوئے، ایف آئی آر میں کہا گیا ہے کہ وہ صبح7 بجے گجر کوہالہ کے مقام سے آزاد کشمیرمیں داخل ہو رہے تھے، دوران چیکنگ وہ شناختی کارڈ نہیں دکھاسکے۔
ایف آئی آر کے متن کے مطابق شاعر کارسرکار میں مداخلت کے جرم میں گرفتار ہوئے، وہ ایک اور مقدمے میں مظفرآباد پولیس کو بھی مطلوب ہیں، اس لیے ان کو مظفرآباد پولیس کے حوالے کردیا گیا تھا۔
