پی ٹی آئی کارکنوں کو ہراساں کرنے اور ان کے گھروں پر چھاپوں سے متعلق اسلام آباد ہائیکورٹ نے تحریری حکم نامہ جاری کردیا ہے۔
اے آر وائی نیوز کے مطابق پی ٹی آئی کارکنان کو ہراساں کرنے اور ان کے گھروں پر چھاپوں سے متعلق اسلام آباد ہائیکورٹ کے چیف جسٹس اطہرمن اللہ نے تحریری حکمنامہ جاری کردیا ہے۔
چیف جسٹس اسلام آباد ہائیکورٹ کے جاری حکم نامے میں کہا گیا ہے کہ پی ٹی آئی کارکنوں کو بلاجواز اور غیر قانونی طور پر ہراساں نہ کیا جائے۔
حکمنامے میں مزید کہا گیا ہے کہ بعض معاملات میں خاندان کےافراد کو بھی بلاجواز ہراساں کیا گیا ہے، اس سلسلے میں ڈی جی ایف آئی اے افسر نامزد کریں جو پی ٹی آئی کے نمائندوں سے رابطہ قائم کرے۔
چیف جسٹس نے کہا کہ ڈائریکٹر سائبر کرائمز ونگ ایف آئی اے ہمایوں بشیر تارڑ پیش ہوئے اور انہوں نے یقین دلایا شکایت میں کارروائی قانون کے مطابق کی جائیگی۔
چیف جسٹس اسلام آباد ہائیکورٹ نے حکمنامے میں مزید کہا ہے کہ شکایت کی صورت میں درخواست کی بحالی کیلیے درخواست دائر کرنے کی آزادی ہوگی۔
