اسلام آباد : احتساب عدالت نے نیب سے سوال کیا کہ بتایا جائے احسن اقبال کیخلاف ریفرنس کب تک دائر کیا جائے گا، جس پر نیب تفتیشی افسر نے کہا کہ جیسے ہی ہیڈ کوارٹرز سے ریفرنس منظور ہوگا آگاہ کریں گے۔
تفصیلات کے مطابق احتساب عدالت میں نارووال سپورٹس سٹی ریفرنس کی سماعت ہوئی ، مسلم لیگ ن کے رہنما احسن اقبال عدالت کے روبرو پیش ہوئے۔
وکیل احسن اقبال نے عدالت کو بتایا احسن اقبال کونیب نےگرفتار کیامگرریفرنس دائرنہ کرسکا، احسن اقبال کو جیل بھیجا گیا، جسمانی ریمانڈ دیا گیا، عدالتی حکم کے باوجود چیئرمین نیب ریفرنس دائرنہ کرنےپروضاحت نہ کرسکے۔
وکیل کا کہنا تھا کہ نیب صرف لوگوں کو گرفتار کررہاہے ، تلوار لٹکی ہوئی ہے ایسا نہیں ہونا چاہیے، جس پر نیب پراسیکیوٹر نے کہا ریفرنس ڈرافٹ منظوری کیلئے ہیڈ کوارٹرز کو بھجوا دیا گیا ہے۔
احتساب عدالت جج محمد بشیر نے کہا وکیل صفائی نے آج تو نیب کی بہت کلاس لے لی ، عدالت نے ملزمان کو ریفرنس دائرہونے تک مرضی سے آنے کی اجازت دے دی۔
جج احتساب عدالت نے سوال کیا نیب بتائے کب تک ریفرنس دائر کیا جائے گا ، جس پر نیب تفتیشی افسر نے جواب دیا کہ جیسے ہی ہیڈ کوارٹرز سے ریفرنس منظور ہوگا آگاہ کریں گے۔
بعد ازاں احتساب عدالت نے نارووال سپورٹس سٹی ریفرنس سے متعلق کیس کی سماعت 22ستمبر تک ملتوی کردی۔
