لاہور: لاہور کی سیشن عدالت نے مسلم لیگ ن کے رہنما رانا ثناءاللہ کو گھر کا کھانا دینے کے حوالے سے درخواست پر فیصلہ محفوظ کرلیا۔
تفصیلات کے مطابق ڈسٹرکٹ سیشن جج لاہور نے رانا ثنا اللہ کو گھر کا کھانا دینے کے حوالے سے درخواست پر سماعت کی۔ عدالتی حکم پر جیل سپرنٹنڈنٹ کی جانب سے رانا ثنا اللہ کو جیل میں کھانا دینے کے حوالے سے رپورٹ پیش کر دی گئی۔
درخواست گزار کا مؤقف تھا کہ جیل سپرنٹنڈنٹ کو کئی بار گھر کا کھانے دینے کے حوالے سے درخواست دی مگر کارروائی نہیں ہو رہی۔ جیل سپرنٹنڈنٹ نے حقائق کے برعکس درخواست مسترد کی۔
رانا ثناءاللہ کے وکیل نے کہا کہ رانا ثنا اللہ بیمار ہیں ان کی صحت کے لیے گھر کا کھانا دینے کی اجازت دی جائے۔ جیل قوانین کے مطابق زیر ٹرائل ملزم کو گھر کا کھانا دیا جا سکتا ہے۔
مسلم لیگ ن کے رہنما کے وکیل نے کہا کہ استدعا ہے کہ عدالت گھر کا کھانا دینے کا حکم دے۔ عدالت نے رانا ثناءاللہ کو گھر کا کھانا دینے کے حوالے سے فیصلہ محفوظ کر لیا۔
یاد رہے کہ گزشتہ ماہ 22 جولائی کو لاہور کی مقامی عدالت نے رانا ثنااللہ کو جیل میں گھر کا کھانا دینے کی درخواست مسترد کردی تھی۔
واضح رہے کہ 2 جولائی کو انسداد منشیات فورس نے رانا ثنا اللہ کو اسلام آباد سے لاہور جاتے ہوئے موٹر وے سے حراست میں لیا تھا ، رانا ثنا اللہ کی گاڑی سے بھاری مقدار میں ہیروئن برآمد ہوئی تھی۔
