لاہور کی مقامی عدالت نے مسجد وزیر خان میں گانے کی عکسبندی کے کیس میں پیش نہ ہونے پر گلوکار بلال سعید کے قابل ضمانت وارنٹ گرفتار جاری کر دیے ہیں۔
ضلع کچہری لاہور میں مسجد وزیر خان میں گانے کی عکسبندی کے کیس کی سماعت ہوئی۔ اداکارہ صبا قمر اور گلوکار بلال سعید عدالت میں پیش نہ ہوئے اور حاضری معافی کی درخواست دائر کی۔
عدالت نے صبا قمر کی ایک دن کی حاضری معافی کی درخواست منظور کر لی جب کہ بلال سعید کی درخواست خارج کر کے قابل ضمانت وارنٹ گرفتاری جاری کر دیے۔
ملزمان کے خلاف پولیس نے مسجد وزیر خان میں گانے کی عکسبندی کا چالان جمع کرا رکھا ہے۔ عدالت نے دونوں ملزمان کو فرد جرم کی کارروائی کے لیے طلب کر رکھا ہے۔
اس سے قبل 4 مارچ کو عدالت نے مسجد وزیر خان میں شوٹنگ کے معاملے پر صبا قمر اور بلال سعید کی بریت کی درخواست مسترد کرنے کا حکم جاری کیا تھا۔
جاری حکم میں قرار دیا گیا تھا کہ ملزمان پر مسلمانوں کے جزبات مجروح کرنے کا الزام ہے، ملزمان پر جرم کے ارتکاب کی حد تک ثبوت موجود ہے۔
عدالت کا کہنا تھا کہ ملزمان پر الزام ثابت کرنے کے لیے پراسیکیوشن کو گواہان کے بیانات قلم بند کرنے ہیں اور ملزمان پر ابھی تک فرد جرم عائد نہیں کی جا سکی۔
حکم نامے میں کہا گیا تھا کہ پراسکیوشن کو ملزمان کے خلاف شواہد لانے کا موقع دیے بغیر فیصلہ نہیں ہو سکتا، عدالت شواہد کے مشاہدے کے بغیر فیصلہ نہیں کر سکتی۔
