اسلام آباد: چین نے کہا ہے کہ برطانوی اخبار گارجین میں سی پیک (چین پاکستان اقتصادی راہداری) سے متعلق رپورٹ مکمل جھوٹ ہے۔
پاکستان میں چینی سفارت خانے نے برطانوی اخبار گارجین کی رپورٹ کو یہ کہتے ہوئے مسترد کر دیا ہے کہ اس میں چینی سفارت کار کا سی پیک سے متعلق بیان مکمل طور پر جھوٹا ہے۔
سفارت خانے کا کہنا ہے کہ گارجین کی رپورٹ میں جو زبان اور بیانات استعمال کیے گئے ہیں، وہ واضح طور پر غیر معتبر اور چین کے مؤقف کی بنیادی سمجھ سے عاری ہیں۔
بیان میں کہا گیا ہے کہ رپورٹر نے پیشہ ورانہ اخلاقیات کی خلاف ورزی کی اور عام سمجھ کے لیے بنیادی احترام کی پامالی کی۔
گارجین نے رپورٹ میں دعویٰ کیا تھا کہ اسلام آباد میں چین کے سیاسی سیکریٹری وانگ شن جیے نے سی پیک منصوبوں کے حوالے سے پاکستانی حکومت پر جھوٹے بیانات دینے کا الزام لگایا۔
رپورٹ کے مطابق شن جیے نے کہا گوادر اور بلوچستان میں چینیوں کے خلاف نفرت پھیل رہی ہے، اگر سیکیورٹی کی یہی صورت حال برقرار رہی تو یہ ترقی کو روک دے گی۔ چینی سفارت خانے نے کہا چین ہمیشہ گوادر بندرگاہ کی تعمیر اور بلوچستان کی ترقی کی حمایت کرتا ہے۔
