اسلام آباد: قومی اسمبلی کے اجلاس میں پاک چین اقتصادی راہداری کے تحت پاکستان کو ملنے والی رقوم کی تفصیلات سامنے آگئی ہیں۔
تفصیلات کے مطابق قومی اسمبلی کے اجلاس میں وقفہ سوالات کے دوران پاک چین اقتصادی راہداری کے تحت پاکستان کو ملنے والی رقوم کی تفصیلات پیش کر دی گئیں۔
وزارت منصوبہ بندی کی جانب سے اجلاس میں بتایا گیا کہ پاکستان چین اقتصادی راہداری منصوبوں کے تحت اب تک 24 ارب 70 کروڑ ڈالر سے رقم موصول ہوئی، اس رقم سے اب تک 43 منصوبے مکمل کیے جا چکے ہیں۔
وزارت منصوبہ بندی کے مطابق پاک چین اقتصادی راہداری کے تحت اس وقت 70 کروڑ ڈالر سے زائد 8 منصوبے زیر تکمیل ہیں، پاک چین اقتصادی راہداری کے تحت دو بلوچستان، دو کے پی کے اور سندھ جبکہ پنجاب اور اسلام آباد میں ایک ایک منصوبہ تکمیل کے مراحل میں ہے۔
علاوہ ازیں وقفہ سوالات میں وزراء کے ایوان میں نہ ہونے پر ڈپٹی اسپیکر نے برہمی کا اظہار کیا، انہوں نے کہا کہ اگر وزراء کا یہی طریقہ کار رہا تو ہم وزیر اعظم کو آگاہ کریں گے۔
قومی اسمبلی اجلاس کے اجلاس سے خطاب کرتے ہوئے ڈپٹی سپیکر نے کہا حنیف عباسی آپ کی باری ہے اب سوال پوچھ لیں، حنیف عباسی نےجواب دیا اب میرا سوال پوچھنے کا دل نہیں کر رہا، آپ نے پہلے بات کرنے کا موقع نہ دے کر میرا دل توڑ دیا ہے آپ سے برسوں پرانی رفاقت ہے آپ سے پیار و خلوص کا رشتہ تاعمر رہے گا۔
