شیخوپورہ : شرپسندعناصرکے خلاف کریک ڈاؤن جاری ہے، شیخوپورہ سے سترملزمان کو گرفتارکرلیا گیا جبکہ کراچی، لاہور، اسلام آباد سمیت شہر شہر سی سی ٹی وی کیمروں اور میڈیا فوٹیجزکی مدد سے ملزمان کو شناخت کیا جارہا ہے۔
تفصیلات کے مطابق احتجاج کی آڑ میں پرتشدد مظاہروں اور توڑ پھوڑ میں ملوث شرپسندوں شرپسند عناصر کے خلاف کریک ڈاؤن کا سلسلہ جاری ہے، شیخو پورہ میں جلاؤ گھیراؤ اور توڑپھوڑ میں ملوث ملزمان کی گرفتاری کیلئے چھاپے مارے گئے۔
ڈی پی او جہانزیب نے بتایا مختلف مقامات سے 70 سے زائد ملزمان گرفتار کئے گئے، ملزمان کو ویڈیوز کی مدد سے شناخت کے بعد گرفتار کیا گیا جبکہ شرپسندوں کے خلاف دہشت گردی کی دفعات کے تحت مقدمات درج ہیں۔
جہانزیب کا مزید کہنا تھا کہ کارروائی کےدوران اہم ملزم حمزہ بھی گرفتارکر لیا گیا۔
کراچی،لاہور،اسلام آباد سمیت شہرشہرسی سی ٹی وی کیمروں اور میڈیا فوٹیجزکی مددملزمان کو شناخت کیا جارہا ہے اور تین ہزار سے زائد ملزمان کیخلاف درجنوں مقدمات درج کر لئے گئے ہیں۔
مزید پڑھیں :یکم اور 2 نومبر کو ہنگامہ آرائی کرنے والوں کے خلاف کارروائی کا فیصلہ
یاد رہے وفاقی حکومت نے یکم اور 2 نومبر کو ہنگامہ آرائی پر سخت کارروائی کا بڑا فیصلہ کرتے ہوئے شرپسندوں کیخلاف کارروائی کیلئے چاروں صوبوں کو مراسلہ بھیج دیا تھا۔
نوٹیفکیشن کے مطابق نجی اور سرکاری املاک کو نقصان پہنچانے والوں کیخلاف ایکشن ہوگا، متاثرہ شہری 5 نومبر کی شام تک حکومت کو آگاہ کریں۔
حکومت نے ہنگامہ آرائی کرنیوالوں کی تصاویر اور تفصیلات پی ٹی اے اور نادرا سے طلب کرلی تھی۔
خیال رہے وزارت داخلہ نے واضح کیا کہ املاک کو نقصان پہنچانے والوں کو نہیں چھوڑا جائے گا،شہریارآفریدی نے واٹس ایپ نمبر 03315480011 جاری کرتے ہوئے شہری سے اپیل کی تھی کہ شرپسندوں کی فوٹیج بھیجیں،شناخت ظاہرنہیں کریں گے۔
واضح رہے گزشتہ ہفتےمذہبی جماعتوں کےاحتجاج کےدوران مظاہرین نے قانون کی خلاف ورزی کرتے ہوئے توڑپھوڑکی تھی ،شہریوں کی املاک کو نقصان پہنچایا اورکئی گاڑیوں کو نذر آتش کیا تھا۔