مانچسٹر: برطانوی شہر مانچسٹر کے ایک قصبے ویگن میں اس وقت ایک دہل دہلا دینے والا واقعہ پیش آیا جب ایک کرین کنٹینر کو اٹھاتے ہوئے وزن نہ سہار سکی اور ٹوٹ کر ایک گھر کی چھت پر گر گئی، سی سی ٹی وی فوٹیج میں دیکھا جا سکتا ہے کہ ایک بچی دردناک موت سے کیسے بال بال بچی۔
برطانوی میڈیا رپورٹس کے مطابق مانچسٹر کے قصبے ویگن کے علاقے ایتھرٹن میں ایک بھاری کرین ایک کنٹینر کو اٹھاتے ہوئے اچانک ٹوٹ کر گر گئی، کرین لانے والی لاری بھی سڑک پر الٹ گئی، جب کہ ٹوٹنے والی کرین ایک گھر کی چھت پر گری جس سے چھت دو ٹکڑے ہو گئی۔
ایک فوٹیج سامنے آئی ہے جس میں دیکھا جا سکتا ہے کہ ایک بچی گارڈن میں بائسیکل پر بیٹھی کھیل رہی تھی، جب اس نے دیکھا کہ کنٹینر بے قابو ہو کر گرنے والا ہے، تو اس نے فوراً سائیکل سے اتر کر گھر کے اندر کی طرف دوڑ لگا دی، اور عین اسی لمحے کنٹینر گھر کے دروازے پر آ کر گرا۔
یہ واقعہ کل صبح پیش آیا، فائر فائٹرز نے موقع پر پہنچ کر گھر کی بجلی اور گیس کی لائنیں بند کرنے کے بعد لاری اور کرین کو ہٹانے کی کارروائی شروع کی، جب کہ متاثرہ کے گھر کے مکینوں کو محفوظ مقام پر منتقل کر دیا گیا، اور ان کے لیے عارضی رہائش کا بندوبست بھی کیا گیا۔
بیوی کے 200 ٹکڑے کرنے والے شوہر نے گوگل پر کیا سرچ کیا؟
حادثے کی وجہ ابھی معلوم نہیں ہو سکی ہے، تاہم یہ واقعہ اس وقت پیش آیا جب طوفان کیتھلین نے برطانیہ کو اپنی تیز ہواؤں کی لپیٹ میں لے لیا ہے، محکمہ موسمیات کی جانب سے وارننگز بھی جاری کی گئیں۔
