لندن: برطانوی وزیراعظم بورس جانسن کے خلاف پارٹی گیٹ اسکینڈل کی تحقیقات کرنے والے لندن پولیس کو بڑا دھچکا ملا ہے۔
غیر ملکی میڈیا رپورٹ کے مطابق نسلی تعصب پر مبنی پیغامات کے تبادلے پر لندن پولیس کی سربراہ کریسیڈا ڈک اپنے عہدے سے مستعفی ہوگئیں ہیں، یہ استعفی ایسے وقت میں سامنے آیا جب کریسیڈا ڈِک کی ٹیم وزیر اعظم بورس جانسن کے گرد گھومتے پارٹی گیٹ اسکینڈل کی تحقیقات کر رہی ہے۔
مئیر لندن صادق خان نے لندن پولیس کی سربراہ کے مستعفی ہونے کی تصدیق کرتے ہوئے کہا کہ وارننگ کے باوجود پولیس چیف نسلی تعصب جیسے حساس معاملے کو کنٹرول کرنے میں ناکام رہیں۔
کریسیڈا ڈک انسداد دہشت گردی کی ایک تجربہ کار افسر اور لندن کی 193 سال پرانی پولیس فورس کی قیادت کرنے والی پہلی خاتون تھیں اور انہیں 2024 تک اس عہدے کے لئے تعینات کیا گیا تھا۔
