پاکستان رواں سال نومبر میں تین ون ڈے اور اتنے ہی ٹی 20 میچوں پر مشتمل سیریز کھیلنے آسٹریلیا جائے گا سیریز سے قبل کرکٹ آسٹریلیا نے اہم فیصلہ کیا ہے۔
کرکٹ آسٹریلیا نے تین ون ڈے اور تین ٹی 20 میچوں پر مشتمل سیریز کے لیے اسٹیڈیم میں پاکستان فین زون بنانے کا اعلان کیا ہے اور مخصوص اسٹینڈ کو پاکستان فین زون کا نام دیا گیا ہے۔
کرکٹ آسٹریلیا کے جاری بیان کے مطابق نماز کی جگہ اور حلال فوڈ کے پاس ایک اسٹینڈ کو پاکستان فینز زون کا درجہ دیا گیا ہے۔
میچ کے ہر وینیو پر ایک اسٹینڈ کو پاکستان فینز زونز بنایا جائے گا اور اس کے قریب نماز کی جگہ اور حلال کھانوں کی دستیابی کا انتظام کیا جائے گا۔
کرکٹ آسٹریلیا کے مطابق پاکستان فینز زون کے ٹکٹوں سے متعلق تمام تفصیلات آئندہ ہفتے جاری کی جائیں گی۔
واضح رہے کہ حالیہ دسمبر اور جنوری میں کھیلی گئی ٹیسٹ سیریز میں بھی پاکستانی فینز کے لیے کرکٹ آسٹریلیا کی جانب سے خصوصی انتظامات کیے گئے تھے جب کہ چند روز قبل آسٹریلیا نے رواں سال ہونے والی بارڈر گواسکر ٹرافی کے لیے انڈیا فینز زون بنانے کا بھی اعلان کیا تھا۔
