The news is by your side.

Advertisement

کشمیریوں سے اظہار یکجہتی، جاوید میانداد کا ایل اوسی کا دورہ کرنے کا اعلان

کراچی: سابق کپتان جاوید میانداد نے کشمیریوں کے ساتھ اظہار یکجہتی کے لیے ایل او سی کا دورہ کرنے کا اعلان کردیا۔

تفصیلات کے مطابق سابق کپتان قومی کرکٹ ٹیم جاوید میانداد نے کشمیریوں کے ساتھ اظہار یکجہتی کے لیے لائن آف کنٹرول کے دورے کا اعلان کرتے ہوئے کہا کہ امن کا پیغام لے کر جاؤں گا۔

جاوید میانداد نے اپنے ویڈیو پیغام میں کھیل اور سیاست سے وابستہ شخصیات کو ساتھ چلنے کی دعوت دی۔

لیجنڈ کرکٹر کا کہنا تھا کہ ظلم و ستم کا نشانہ بننے والے کشمیریوں سے اظہار یکجہتی کے لیے احتجاج کروں گا، دنیا کی توجہ مقبوضہ کشمیر پر ہونے والے مظالم کی جانب کروانا چاہتا ہوں۔

جاوید میانداد نے کہا کہ جو میرے ساتھ چلنا چاہتا ہے، آئے ساتھ چلے، کشمیریوں کی جدوجہد کبھی ختم نہیں ہوسکتی، دنیا میں نئے ملک بنتے رہیں گے، جس طرح پاکستان کو بننے سے کوئی نہیں روک سکا، اسی طرح کشمیر کو آزاد ہونے سے کوئی نہیں روک سکتا۔

یاد رہے کہ چند روز قبل پاکستانی نژاد برطانوی باکسر عامر خان نے بھی کشمیریوں سے اظہار یکجہتی کا اظہار کرنے کے لیے ایل او سی کا دورہ کرنے کا اعلان کیا تھا۔

کشمیریوں سے اظہار یکجہتی کے لیے باکسر عامر خان منگل کو لندن سے اسلام آباد پہنچیں گے۔

خیال رہے کہ مقبوضہ کشمیر میں 22 روز سے جاری کرفیو سے عوام کا جینا دوبھر ہوگیا ہے اور اب غذائی قلت کے خطرات بھی منڈلانے لگے ہیں۔

پانچ اگست کو مودی سرکار کی جانب سے آرٹیکل 370 اور 35 اے کو منسوخ کرکے مقبوضہ کشمیر کی خصوصی حیثیت اور نیم خود مختاری ختم کردی گئی تھی۔

Comments

comments

یہ بھی پڑھیں