موسم کی مداخلت یا کوئی تنازع کرکٹ میچ کو مختصر کرتا ہے مگر پہلی بار ٹریفک کی مداخلت نے ایک ون ڈے میچ کو مختصر کرا دیا۔
کرکٹ کی تاریخ کا یہ انوکھا واقعہ عمان میں پیش آیا جہاں امریکا اور نمیبیا کی ٹیمیں ٹریفک جام میں پھنس جانے کے باعث بروقت اسٹیڈیم میں نہ پہنچ سکیں، جس کی وجہ سے میچ کو مختصر کرنا پڑا۔
کرکٹ ویب سائٹ کے مطابق عمان کے الامارات اسٹیڈیم میں کرکٹ ورلڈ کپ لیگ ٹو کے سلسلے میں امریکا اور نمیبیا کی ٹیموں کے درمیان شیڈول ون ڈے میچ صرف اس وجہ سے بروقت شروع نہ ہوسکا کہ دونوں ٹیمیں ٹریفک جام میں پھنس گئی تھیں۔
رپورٹ کے مطابق دونوں ٹیمیں ہوٹل سے اسٹیڈیم کے لیے مقررہ وقت پر نکلی تھیں۔ تاہم درمیان میں شدید ٹریفک جام کی وجہ سے ٹیمیں اس میں پھنس کر رہ گئیں اور وقت مقررہ پر نہ پہنچ سکیں۔
ٹیموں کے تاخیر سے پہنچنے کے بعد میچ کو 43 اوور کا کر دیا گیا۔
میچ کے حوالے سے سماجی رابطوں کی ویب سائٹ ایکس پر امریکی ٹیم نے بھی ایک پوسٹ کی ہے جس میں کہا گیا ہے کہ میچ میں تاخیر ’غیر متوقع لاجسٹک حالات‘ کی وجہ سے ہوئی، لیکن ٹیم نے تاخیر کی اصل وجہ واضح نہیں کی۔
تاہم امریکا میں مقیم صحافی پیٹر ڈیلا پینا اس پوسٹ پر ردعمل دیتے ہوئے دعویٰ کیا ہے کہ مسقط میں آئرن مین ریس کی وجہ سے ہونے والے ٹریفک جام کے باعث میچ میں تاخیر ہوئی۔ تاہم ان کے اس دعوے کی تصدیق تاحال نہیں ہو سکی اور نہ ہی آئی سی سی یا الامارات اسٹیڈیم نے اس پر کوئی وضاحت جاری کی ہے۔
واضح رہے کہ مذکورہ میچ امریکا نے نمیبیا کے خلاف 114 رنز کے واضح مارجن سے جیت حاصل کی۔
