عالمی شہرت یافتہ فٹبالر کرسٹیانو رونالڈو کو سعودی عرب آئے ہوئے دو برس بیت چکے ہیں، ایک انٹرویو کے دوران انہوں نے اپنے اب تک کے سفر کے حوالے سے بات کی۔
سعودی خبر رساں ادارے کی رپورٹ کے مطابق کرسٹیانو رونالڈو نے کہا کہ ’اس خوبصورت ملک میں نئی زندگی کا آغاز ہوا ہے۔
اسٹار فٹبالر نے روشن پروفیشنل لیگ ویب کو انٹرویو کے دوران سعودی عرب آمد کو اپنے لیے باعث اعزاز قرار دیا، سعودی لیگ میں شامل ہونے والے سٹارز میں وہ اولین تھے۔
انہوں نے سعودی عرب میں اپنے قیام پر اطمینان کا اظہار کیا اور کہا میں خوش ہوں، ہم نے اس خوبصورت ملک میں ایک نئی زندگی کا آغاز کیا ہے، میرا خاندان خوش ہے۔ اس ملک سے بہت متاثر ہوں۔
اسٹار فٹبالر نے کہا کہ میرے لیے یہ ایک اعزاز ہے کہ لیگ کو ترقی کرتا دیکھوں، اس میں متعدد کھلاڑی شامل ہوں اور بہترین مقابلے ہوں۔ یہ محض کھلاڑیوں کی حد تک نہیں بلکہ میرا خواب ہے کہ ملک اس حوالے سے مثالی ترقی کرے اور دیگر لیگ کے ساتھ خوبصورت مقابلے ہوں۔
اسٹار کھلاڑی کا النصر کلب کے ساتھ یادگار لمحات کے سوال پر کہنا تھا کہ الھلال کے ساتھ پہلا فائنل جو کہ 2023 میں کنگ سلمان کپ کے لیے کھیلا گیا، انتہائی دلچسپ اور پرجوش تھا۔
النصر نے وہ میچ جو طائف کے کنگ فہد سٹیڈیم میں کھیلا تھا 1-2 سے فتح حاصل کرلی تھی، اسٹار فٹبالر کے دو گولز نے چیمپیئن شپ کا ٹائٹل النصر کو دلایا، یہ دونوں گول اس وقت ہوئے جب الھلال کی جانب سے النصر کے خلاف ایک گول ہو چکا تھا۔
وائرل ویڈیو: کرسٹیانو رونالڈو کے بیٹے نے کس بات پر ’’انشااللہ، انشااللہ‘‘ کہا؟
انہوں نے اس یقین کا اظہار کیا کہ نیا سال النصر کیلیے نیک شگون اور اچھا ثابت ہو گا۔ اُنہوں نے کہا کہ النصر کے لیے اے ایف سی چیمپیئنز لیگ جیتنا چاہتا ہوں۔
