عالمی مارکیٹ میں خام تیل کو پھر پر لگ گئے، قیمتیں 121 ڈالر فی بیرل سے بھی تجاوز کرگئی۔
غیر ملکی میڈیا کے مطابق انٹرنیشنل مارکیٹ میں خام تیل کی قیمتوں ایک مرتبہ پھر ہوشربا اضافہ دیکھنے میں آرہا ہے جس کی وجوہات میں روس اور یوکرین جنگ بھی شامل ہیں۔
رپورٹ میں کہا گیا ہے کہ برینٹ خام تیل کی قیمت میں 6 ڈالر 12 سینٹ کا اضافہ ہوا ہے جس کے بعد عالمی منڈی میں تیل کی قیمت 121 اعشاریہ 60 ڈالر فی بیرل ہوگئی ہے۔
انٹرنیشنل مارکیٹ میں ڈبلیو ٹی آئی خام تیل 5 ڈالر 66 سینٹ مہنگا ہونے کے بعد 114.93 ڈالر پر فروخت ہورہا ہے۔
خام تیل کی قیمتوں میں اضافے کے سبب دیگر اشیاء کی قیمتوں میں بھی اضافے کا خدشہ بڑھ گیا ہے جس کے اثرات براہ راست غریب اور متوسط طبقے پر پڑیں گے۔
خیال رہے کہ گزشتہ دنوں چین کی معیشت میں سست روی کے باعث خام تیل کی قیمتوں میں دس فیصد سے زائد کمی آئی تھی جس کے بعد خام تیل کی قیمت 110 ڈالر فی بیرل سے بھی نیچے گر گئی تھی۔
