کراچی: شمالی بحیرہ عرب میں پاک بحریہ اور پاک فضائیہ کا لانگ رینج اینٹی شپ کروز میزائلوں کی فائرنگ کا کامیاب مظاہرہ کیا گیا‘ میزائل فائرنگ کا یہ مظاہرہ بحری مشق رباط کے اختتام پر کیا گیا۔
تفصیلات کے مطابق پاک بحریہ اور پاک فضائیہ کی مشترکہ کاوشوں سے کروز میزائل فائرنگ کے کامیاب مظاہرے کے موقع پرسربراہ پاک بحریہ ایڈمرل ظفر محمود عباسی اور سربراہ پاک فضائیہ ایئر چیف مارشل سہیل امان موجود تھے اور انہوں نے پی این ایس نصر سے میزائلوں کی فائرنگ کے عملی مظاہرے کا معائنہ کیا ۔
ترجمان پاک بحریہ کےمطابق میزائل کو پاک فضائیہ کے جے ایف 17 تھنڈر ایئر کرافٹ اور پاک بحریہ کے ایف 22 پی فریگیٹ پی این ایس سیف سے فائر کیا گیا۔ پی این ایس سیف نے سطح سمندر سے سطح سمندر پر مار کرنے والا میزائل سی 802 فائر کیا‘ جبکہ جے ایف تھنڈر نے ہوا سے سطح سمندر میں مار کرنے والےمیزائل سی 802 اے کے ‘ کی فائرنگ کا عملی مظاہرہ کیا۔
بحریہ ذرائع کے مطابق دونو ں پلیٹ فارمز سے فائر کیے گئے میزائلوں نے اپنے اپنے اہداف کو کامیابی سے نشانہ بنایا۔ اس موقع پر ترجمان کا کہنا تھا کہ بحیرہ عرب میں میزائل فائرنگ کا یہ تجربہ پاک بحریہ اور پاک فضائیہ کے مشترکہ آپریشنز کی صلاحیت کا منہ بولتا ثبوت ہے
ایڈمرل ظفر محمود عباسی کا کہنا تھا کہ پاک بحریہ اور فضائیہ ملکی سرحدوں کے تحفظ کی مکمل صلاحیت رکھتی ہے‘ امیرالبحر نے اس موقع پر پاکستان نیول فلیٹ کی آپریشنل تیاریوں پر مکمل اطمینان کا اظہار کیا۔بعد ازاں پاک بحریہ اور پاک فضائیہ کی جانب سے مشترکہ فلائی پاسٹ کا شاندار مظاہرہ بھی پیش کیاگیا ۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں
