پشاور: محکمہ انسداد دہشت گردی نے افغانستان سے ویزے پر آئے بھتہ خور دہشت گردوں کو گرفتار کرلیا، ملزمان پشاور میں بھتے وصول کر رہے تھے۔
تفصیلات کے مطابق محکمہ انسداد دہشت گردی حکام کا کہنا ہے کہ پشاور سے کالعدم تنظیم کے 2 غیر ملکی بھتہ خور دہشت گرد گرفتار کرلیے گئے۔
سی ٹی ڈی کا کہنا ہے کہ دہشت گردوں پر مقدمہ درج کرلیا گیا، دہشت گرد افغانستان سے بھتہ وصولی کے لیے 60 دن کے ویزے پر آئے تھے۔ دہشت گردوں سے موبائل، سمز اور زائد المیعاد پاسپورٹس برآمد ہوئے۔
سی ٹی ڈی کے مطابق ملزمان نے پشاور کے مختلف شہریوں سے بھتہ طلب کیا تھا، بھتہ نہ دینے کی صورت میں سنگین نتائج کی دھمکیاں بھی دی تھیں۔
دوسری جانب آج صبح سیکیورٹی فورسز کی جنوبی وزیرستان میں کارروائی کے دوران کالعدم تحریک طالبان پاکستان کا سرگرم دہشت گرد مارا گیا۔
پاک فوج کے شعبہ تعلقات عامہ آئی ایس پی آر کے مطابق سیکیورٹی فورسز نے جنوبی وزیرستان کے علاقے لدھا میں آپریشن کیا تھا، کارروائی کے دوران دہشت گردوں سے فائرنگ کے تبادلے میں دہشت گرد پیر عرف اسد مارا گیا۔
آئی ایس پی آر کا کہنا ہے کہ پیر عرف اسد سنہ 2006 سے کالعدم تحریک طالبان پاکستان کا سرگرم رکن تھا، پیر عرف اسد نے بیت اللہ محسود گروپ میں رہ کر دہشت گردی کارروائیاں انجام دی تھیں۔
