پشاور: خیبرپختونخواہ کے دارالحکومت میں انسداد دہشت گردی فورس نے کارروائی کرتے ہوئے کالعدم دہشت گرد تنظیم داعش کے دہشت گروں کو گرفتار کرلیا۔
محکمہ انسداد دہشت گردی (سی ٹی ڈی) نے کارروائی کے دوران داعش کے 2 دہشت گرد کو پشاور سے گرفتار کرلیا، سی ٹی ڈی ترجمان کے مطابق گرفتار دہشت گرد جے یو آئی کے سربراہ مولانا فضل الرحمان اور اے این پی کے صوبائی صدر ایمل ولی کو نشانہ بنانا چاہتے تھے۔
سی ٹی ڈی ترجمان کے مطابق ایک خودکش حملہ آور اور ایک سہولت کار کو گرفتار کیا گیا، خودکش حملہ آور کی نشاندہی پر 2 خودکش جیکٹس، 3 دستی بم اورپستول برآمد ہوئے۔
سی ٹی ڈی کے ایس ایس پی آپریشنز نجم الحسنین لیاقت نے پریس کانفرنس میں بتایا کہ عادل نامی خودکش حملہ آور کو متنی میرہ سے گرفتار کیا گیا۔
ایس ایس پی نجم الحسنین نے کہا کہ حملہ آوروں نے مفتی محمود مرکز کی ریکی بھی کی تھی، دہشت گردوں نے پکتیا افغانستان مرکز سے فدائی ٹریننگ حاصل کی۔
