لاڑکانہ : سی ٹی ڈی نے 14 اگست کو میونسپل اسٹیڈیم سمیت مختلف مقامات پر دھماکے کرنے کی منصوبہ بندی کرنے والے دو دہشتگردوں کو گرفتار کرلیا۔
تفصیلات کے مطابق سی ٹی ڈی کے ڈی ایس پی سید اصغر شاہ نے پریس کانفرس کرتے ہوئے کہا کہ لاڑکانہ کے نئودیرو روڈ پر حساس اداروں اور محکمہ انشداد دہشت گردی کی جانب سے مشترکہ کاروائی کر کے کالعدم تنظیم کے دو انتہائی مطلوب دہشت گردوں کو گرفتار کرلیا گیا ہے۔
سید اصغر شاہ نے بتایا کہ دہشت گردوں کی شناخت ڈوکری کے رہائشی جمیل احمد شیخ اور باقرانی کے رہائشی صلاح الدین جتوئی کے نام سے ہوئی۔
ان کا کہنا ہے کہ گرفتار دہشتگردوں نے افغانستان میں بارودی مواد بنانے اور چلانے کی ٹریننگ حاصل کی جبکہ 29 مئی کو اے ایس پی آفس لاڑکانہ میں کریکر دھماکا بھی کیا تھا۔
ڈی ایس پی نے کہا کہ گرفتار دہشتگرد 14 اگست پر لاڑکانہ کے مختلف مقامات پر بم دھماکوں کی منصوبہ بندی کرنے کے علاوہ کئی اہم شخصیات کی ریکی کر رہے تھے۔
گرفتار دہشتگردوں سے آدھا کلو بارودی مواد، ڈیٹونیٹرز، ہینڈ گرنیڈ اور دیگر سامان برآمد کیا گیا ہے۔
سید اصغر شاہ نے مزید بتایا کہ دونوں دہشتگرد مختلف دہشت گردی کی کاروائیوں میں مطلوب تھے، جن کی خلاف انسداد دہشت گردی اور ایکسپلوسو ایکٹ کے تحت مقدمہ درج کر لیا گیا ہے۔
